Kryeministrja e Bangladeshit Sheikh Hasina ka siguruar mandatin e saj të katërt radhazi në zgjedhjet që po cilësohen si të të diskutueshme, ka raportuar BBC.
Hasina do të shërbejë edhe pesë vjet të tjera në detyrë pasi partia e saj Awami League dhe aleatët e saj fituan të paktën 152 nga 300 vendet parlamentare të kontestuara.
Zgjedhjet u bojkotuan nga opozita kryesore, Partia Nacionaliste e Bangladeshit, e cila ka pretenduar se zgjedhjet janë “mashtrim”.
Rezultati i së dielës vjen pas arrestimeve masive të drejtuesve dhe mbështetësve të BNP
Të pavarurit fituan 45 vende dhe Partia Jatiya fitoi tetë vende. Rezultatet pritet të shpallen zyrtarisht më vonë të hënën.
Ky është mandati i pestë në total për Hasina, e cila për herë të parë u bë kryeministre në vitin 1996 dhe u rizgjodh në vitin 2009, duke qëndruar në pushtet që atëherë.
“BNP është një organizatë terroriste,” u tha ajo gazetarëve pasi hodhi votën e saj. “Unë po përpiqem më të mirën për të siguruar që demokracia të vazhdojë në këtë vend.”
Human Rights Watch (HRW) vlerëson se rreth 10,000 aktivistë u arrestuan pasi një tubim i opozitës më 28 tetor u shndërrua në dhunë, duke rezultuar në vdekjen e të paktën 16 personave dhe plagosjen e më shumë se 5,500. Ai akuzoi qeverinë për “mbushjen e burgjeve me kundërshtarët politikë të Ligës Awami në pushtet”.
Awami League i ka mohuar këto akuza.
