Për boksieren kosovare, Donjeta Sadiku, 2023-shi, ishte vit mjaft i suksesshëm pasi u shpall kampione e Ballkanit në konkurrencën e saj, e po ashtu u rendit edhe si e pesta në Lojërat Evropiane.
Ajo thekson se përtej këtyre sukseseve, kishte pritje akoma më të mëdha nga vetja e saj.
Ajo pranon se kishte synuar që kualifikimin për në Lojërat Olimpike Parisi 2024, ta siguronte gjatë vitit 2023, por kjo nuk ndodhi.
Sadiku shprehet e habitur se si edhe pas këtyre sukseseve nuk ka marr mbështetjen e duhur nga ana e shtetit. Vitin 2024, kampionia ballkanike e sheh si vit të realizimit të ëndrrës së saj të madhe, që të ngris flamurin e Kosovës në Paris duke fituar medalje atje.
Për t’i realizuar objektivat e saj, Donjeta po stërvitet fuqishëm, por për fat të keq në kushte tejet të vështira dhe për këtë situatë ajo shprehet krejtësisht e zhgënjyer. Besim të madh tek puna e Sadikut ka edhe vet trajnerja e saj, Marjola Sallauka. Ajo shprehet e bindur se me punën që po bëhet, do të arrihet edhe norma për kualifikim në Lojërat Olimpike
Garat për ta fituar normën që siguron pjesëmarrjen në Lojërat Olimpikë Parisi 2024, Donjeta Sadiku do t’i nis në muajin shkurt.
