Sulmuesi amerikano-spanjoll i Prishtinës, Jalen Miller Blesa vazhdon të mbetet një emër i kërkuar në afatin kalimtar të janarit, ku klubet e interesuara për shërbimet e tij po rriten dita-ditës.
Blesa deri më tani këtë sezon ka realizuar 10 gola dhe ka kontribuuar me tri asistime në 18 paraqitje me fanellën e kryeqytetasve
Paraqitjet e tij të mira dhe kontrata pranë skadimit, pasi ka edhe gjashtë muaj, ka bërë që sulmuesi të bëhet një emër i lakuar nga klubet evropiane.
Sheriff Tiraspol, Oleksandriya, Universitatea Craiova dhe disa klube të tjera janë të interesuara për shërbimet e Blesas
Megjithatë, tani në garë për transferimin e sulmuesit spanjoll kanë hyrë edhe dy klube tjera.
Sipas mediumit rumun Fanatik, Steaua Bukureshti apo i njohur tani si FCSB dëshiron transferimin e Blesas në afatin kalimtar të janarit.
Ky medium shton se sulmuesi i Prishtinës pëlqehet shumë, shkaku i moshës dhe çmimit që nuk mund të shkoj mbi 200 mijë euro, pasi në të ardhmen mund të shitet shumë më shtrenjtë.
Telegrafi gjithashtu mëson se për sulmuesin Blesa interesim ka shprehur edhe klubi zviceran, Schaffhausen, i cili bën gara në ligen e dytë të Zvicrës.
Për të ardhmen e tij, Telegrafi ka kontaktuar drejtorin sportiv të Prishtinës, Driton Krasniqin, i cili ka konfirmuar shkurtimisht ofertat për lojtarin.
“Janë disa oferta për Blesan, do të shohim se çfarë do të bëjmë”, ka thënë Krasniqi për Telegrafin.
Ndryshe, Prishtina me datë 13 janar do të udhëtoj drejt Turqisë për fazën përgatitore, ku do të luajë edhe finalen e Superkupës së Kosovës ndaj Ballkanit dhe Telegrafi mëson se Blesa nuk do të udhëtoj fare me ekipin.
