Presidenti i Maldiveve Mohamed Muizzu i ka kërkuar Indisë të tërhiqet deri më 15 mars ushtarët e tij, rreth njëqind, të vendosur në vend, njoftoi për shtyp të dielën një nga bashkëpunëtorët e tij kryesorë.
“Presidenti Mohamed Muizzu e paraqiti këtë kërkesë gjatë takimit të komitetit të nivelit të lartë midis dy kombeve… Propozimi është aktualisht në studim”, u tha gazetarëve ky zyrtar i lartë.
Afati i 15 marsit u caktua të dielën gjatë diskutimeve me zyrtarët indianë në këtë arkipelag të Oqeanit Indian, tha sekretari i politikave publike të Mohamed Muizzu, Abdulla Nazim Ibrahim. Kërkesën e tij e bëri të nesërmen e kthimit nga Kina, ku nënshkroi një sërë marrëveshjesh.
Nju Delhi e ka konsideruar prej kohësh arkipelagun e Oqeanit Indian si pjesë të sferës së tij të ndikimit, por që nga zgjedhjet e fundit presidenciale, ky vend tani po anon drejt Kinës, kreditorit më të madh të Maldiveve.
Të mërkurën, Pekini dhe Male nënshkruan disa marrëveshje, veçanërisht për klimën, bujqësinë dhe infrastrukturën.
Pas një donacioni fillestar helikopterësh, Nju Delhi forcoi praninë e tij ushtarake në Maldive në vitin 2016 dhe ushtarët indianë kanë përdorur tre avionë në vitet e fundit për patrullime në zonën detare të arkipelagut.
Maldivet, të njohura si një nga destinacionet turistike më të njohura të Azisë Jugore me plazhe të pacënuara me rërë të bardhë dhe resorte luksoze, janë bërë gjithashtu një pikë fërkimi midis Indisë dhe Kinës.
Arkipelagu i përbërë nga 1192 ishuj të vegjël në Oqeanin Indian zë një pozicion strategjik, pasi përshkohet nga korsitë kryesore të transportit lindje-perëndim.
