Skuadra e Prishtinës ka arritur ta fitojë trofeun e Superkupës së Kosovës, pasi mposhti në finale kampionin aktual të Kosovës, Ballkanin.
Bardh e kaltrit triumfuan në finale me rezultat 2:1. Për Prishtinën ky është trofeu i 11-të i Superkupës së Kosovës.
Prishtina arriti ta zhbllokojë rezultatin në minutën e nëntë të takimit me golin e Egzon Sinanit, teksa arriti ta ruante rezultatin deri në përfundim të pjesës së parë.
Me të filluar pjesa e dytë, Prishtina dyfishoi epërsinë. Golin e dytë për ekipin më të trofeshëm në Kosovë e shënoi Leotrim Kyreziu. Ai realizoi pas harkimit të Kreshnik Ukës.
Pas pesë zëvendësimeve nga trajneri Ilir Daja, Ballkani gjeti golin e parë në ndeshje, por ishte shumë vonë për një rikthim të mundshëm.
Golaj shënoi golin e vetëm në këtë ndeshje për Ballkanin duke realizuar në minutën e 78-të të takimit. Ndërsa, ishin të pafat për të arritur edhe golin e barazimit.
Ky është trofeu i parë për Prishtinën në vitin 2024 dhe trofeu i parë nën drejtimin e trajneri Emmanuel Egbo.
