Kryetari i Gjakovës, Ardian Gjini, ka thënë se vetëm kjo komunë ka pothuajse gjysmën e eksportit total të shtetit të Kosovës.
Në emisionin Rubikon në Klan Kosova, ai ka treguar se një kontratë mes Comoditës dhe Rronifer është 80 milionë euro.
“Falë bizneseve dhe falë ritmit të zhvillimit, investimet kapitale në Gjakovë kanë shkuar prej rangut 3.5 milionë në vit, në 17.5 milionë në vitin e kaluar, për 5-6 vjet”, ka thënë Gjini.
“Të hyrat e komunës kanë shkuar prej rangut 2.8 deri në 3 milionë, në 6.6 milionë vitin që e lam pas. Shifrat janë të mëdha dhe nëse e shohim tani edhe daljen prej Gjakovës, në vitin 2022, iu kemi afruar gjysmës së eksportit total të krejt Kosovës”, ka shtuar ai.
Tutje, ai ka treguar se si në vitin 2018 e ka themeluar një këshill publiko-privat me idenë që ndërmarrjet publike, drejtoritë komunale edhe bizneset të takohen një herë në 3 muaj dhe të diskutojnë.
“Kanë nisur bashkëpunimet sikur në mes dy kompanive më të mëdha që i kemi tani. 80 milionëshe lidhet kontrata mes dy kompanive që punojnë në Gjakovë që nuk e kanë ditur se mund të kenë këso lloj kontratash. Bëhet fjalë për Comodita me RroniFer, që mbiprodukti shndërrohet në produkt kryesor”, ka thënë kryetari Ardian Gjini
