Ministri i Drejtësisë së Danimarkës, Peter Hummelgaard, ka zhvilluar takime sot me opozitën e Kosovës. Kreu i PDK-së, Memli Krasniqi, thotë se të njëjtin e ka njoftuar se partia e tij nuk merr pjesë në votimin e pikave në Kuvend të cilat sillen nga ana e Qeverisë, përfshirë edhe Marrëveshjet Ndërkombëtare.
Në një postim në Facebook-un e tij, Krasniqi thotë se:
“Delegacionin e lartë nga Danimarka e njoftova për zhvillimet e fundit në Kosovë, sfidat dhe rreziqet me të cilat po ballafaqohet vendi, si dhe qëndrimet e PDK-së në lidhje me to. Mysafirëve ua shpreha qëndrimin që Partia Demokratike e Kosovës kërkon sa më parë zgjedhje të reja të parakohshme dhe se aktualisht nuk merr pjesë në votimin e pikave në Kuvend të cilat sillen nga ana e Qeverisë, përfshirë edhe Marrëveshjet Ndërkombëtare”.
Për takimin me ministrin danez, ka njoftuar edhe Arben Gashi, shef i GP-së së LDK-së, duke thënë se me të biseduan për “thellimin e bashkëpunimit mes dy vendeve tona”
“Danimarka ka qenë dhe mbetet vend mik e mbështetës i Republikës së Kosovës, me theks të veçantë në rrugëtimin integrues”, shprehet ai
Kreu i AAK-së Ramush Haradinaj njoftoi gjitashtu se ka zhvilluar takim me ministrin e Drejtësisë së Danimarkës, Peter Hummelgaard, me të cilin tha se biseduan për zhvillimet politike në vend dhe çështjet që kanë të bëjnë me sundimin e ligjit.
“Ministrin Hummelgaard e falënderova për rolin konstruktiv të Danimarkës, e cila gjithmonë ka qenë mbështetëse e fuqishme e vendit tonë në proceset euroatlantike dhe në proceset e tjera shtetndërtuese”, thotë Haradinaj.
