Lëvizja Vetëvendosje, ka publikuar një video në llogarinë zyrtare në Facebook, duke thënë se 14 shkurti është dëshmia e fuqishme e përpjekjeve e vullnetit të popullit për ta ndërtuar një të ardhme më të mirë dhe të qëndrueshme për veten e tij.
Në video paqyrohet puna e Qeverisë Kurti përgjatë këtyre tri viteve qeverisje
Anëtari i Kryesisë së LDK-së, njëherit kryetari i degës së kësaj partie në Ferizaj, Visar Azemi, ka reaguar ndaj kësaj videoje, duke e quajtur propagandë e pushtetit.
“Propagandistët në pushtet paskan bërë orvatje që tre vite mandat t’i përmbledhin në një video dy minutëshe. Natyrisht që minutazhë e madhe kjo në përpjekjen për të numëruar suksese, prandaj qenkan detyruar që në shumicën e saj të mashtrojnë”, tha ai
Sipas tij, shpifjet për arritje në shëndetësi, arsim, energji, bujqësi, ekonomi e çdo dikaster tjetër të përcjellura me fotografi e video të bukura, nuk e ndryshojnë realitetin e hidhur të regresit të Kosovës gjatë tre viteve të Kurtit në pushtet.
“Vetëm tellallët e zyrës së mediave të VV-së mund të flasin për suksese të pushtetit dhe zhvillim të Kosovës. Kushdo që ka jetuar këtu këto tre vite ka bashkëjetuar me dështimet e kësaj qeverie e stagnimin e shtetit”, shkroi Azemi në Facebook.
