Zgjedhjet e ardhshme në pjesën veriore të Kosovës të banuar me shumicë serbe paraqesin një mundësi për Forcën e NATO-s (KFOR) që të zbatojë mandatin ekzistues, duke mbrojtur integritetin e zgjedhjeve nëpërmjet asistimit të Policisë së Kosovës në ofrimin e sigurisë, veçanërisht duke pasur parasysh rrezikun nga shpërthimi i dhunës pas tensioneve të fundit.
Luke James, ekspert i mbrotjes dhe sigurisë njerëzore, në një analizë të fundit mbi procesin e ardhshëm zgjedhor në katër komunat veriore të Kosovës – Mitrovicë e Veriut, Leposaviq, Zveçan dhe Zubin Potok – shkruan se KFOR-i duhet të jetë i gatshëm të ofrojë siguri në mbrojtje të procesit demokratik zgjedhor, duke garantuar tre liritë themelore të sigurisë njerëzore.
“Në kohën kur veriu i Kosovës i afrohet zgjedhjeve kritike, KFOR-i duhet të jetë i gatshëm të ofrojë mbështetje sigurie për të mbrojtur procesin demokratik kur kërkohet. Ky qëndrim proaktiv përputhet me tre liritë kryesore të sigurisë njerëzore; liria nga frika, liria nga nevoja dhe liria për të jetuar me dinjitet në një rajon të rrethuar nga tensionet historike”, shkroi ai.
Duke kujtuar se zgjedhjet e lira janë themeli i demokracisë, ai vlerësoi se në pjesën veriore të Kosovës, procesi zgjedhor mund të jetë i cenueshëm ndaj akteve të dhunës. Prandaj, shtoi eksperti britanik, misioni paqeruajtës i KFOR-it mund të ndihmojë për të garantuar një mjedis të sigurt në ditën e zgjedhjeve, duke rritur gjithashtu praninë afër qendrave të votimit.
“Një shfaqje e vazhdueshme e forcës nga KFOR-i do të izolojë dhunën para dhe pas zgjedhjeve, duke mbrojtur qytetarët dhe zyrtarët. Prania e shtuar e KFOR-it do të parandalojë edhe taktikat afatgjata që synojnë zhvendosjen e grupeve pakicë nga kufijtë elektoralë – një formë hibride e manipulimit zgjedhor përmes spastrimit de factoetnik”, shkroi mes tjerash James.
Në këtë drejtim, duke vendosur kushtet për zgjedhje të lira dhe të sigurta, KFOR-i në të njëjtën kohë do të mbështeste edhe thirrjet e Bashkimit Evropian (BE) dhe Shteteve të Bashkuara të Amerikës (SHBA) që zgjedhjet në veri të mbahen sa më shpejtë. Gjithashtu, sipas tij, gjetja e stabilitetit në veri është një “hap kyç” në rrugën e Kosovës drejt integrimeve evropiane.
“Nga këndvështrimi i NATO-s, ekzistojnë motive morale, strategjike dhe ekonomike për të nxitur demokracinë e qëndrueshme në rajonin e Kosovës të prirur ndaj konflikteve. NATO-ja mund të pengojë cenuesit e brendshëm, rajonalë dhe gjeopolitikë, ndaj interesave të Kosovës dhe të vazhdojë të ndërtojë stabilitet afatgjatë në Kosovë – një vend aspirant për NATO-n”.
Një ndër kushtet e BE-së për largimin e masave kufizuese ndaj Kosovës të vendosura në qershor 2023 për shkak të përshkallëzimit të situatës në pjesën veriore të vendit është shpallja e zgjedhjeve të jashtëzakonshme dhe organizimi në mënyrë gjithëpërfshirëse në të gjitha katër komunat serbe në veri, kurse nga serbët lokalë kërkohet që të marrin pjesë pa kushtëzime./Albanian Post
