Një numër i madh ushtarësh ukrainas janë vrarë në një sulm ajror të vetëm, ka pohuar një gjeneral rus. Zëvendës shefi i Shtabit të Përgjithshëm të Forcave të Armatosura Ruse i tha ministrit rus të Mbrojtjes Sergei Shoigu gjatë një takimi se deri në 300 ushtarë u vranë “si rezultat i një sulmi të saktë nga një municion ajror”, tha sot Ministria e Mbrojtjes e Rusisë.
CNN nuk ka arritur ende të verifikojë në mënyrë të pavarur numrat dhe nuk ka pasur asnjë koment të menjëhershëm nga Ukraina. Gjeneralkoloneli Alexei Kim nuk tregoi se ku ndodhi sulmi, por e përshkroi vendndodhjen e sulmit si “pika e vendosjes së formacionit nacionalist “Kraken”, sipas ministrisë, duke iu referuar një njësie speciale të Inteligjencës së Mbrojtjes së Ukrainës. Detajet dolen gjatë një takimi në selinë e Grupit të Përbashkët të Forcave, ku Shoigu dëgjoi raportime nga komandantët mbi situatën aktuale në “zonën e operacionit special ushtarak”.
Gjeneralkoloneli Kim gjithashtu nuk përmendi se kur u krye sulmi, por vuri në dukje se sipas raporteve të ministrisë “vetëm gjatë javës së kaluar, si rezultat i punës efektive të sistemeve të zbulimit dhe goditjes, janë shkatërruar tre komplekse amerikane Patriot, një raketë hedhëse e shumëfishtë Vampire, më shumë se 10 të prodhimit të huaj, sisteme të artilerisë dhe depot e karburantit dhe municionit”.
Kim i tha gjithashtu Shoigut gjatë takimit se Ukraina “po pëson humbje të konsiderueshme si në pajisje ashtu edhe në fuqi ushtarake si rezultat i përdorimit të armëve me precizion të lartë dhe dronëve sulmues”, thuhet në ministri./CNN
