Anësori brazilian Vinicius Junior tha se dëshira e tij për të luajtur futboll po zvogëlohet për shkak të incidenteve të abuzimit racor kundër tij në Spanjë.
Këto komente i bëri mes lotësh, gjatë një paraqitjeje që bëri të hënën në media.
Sulmuesi i Real Madrid ka pësuar abuzime nga tifozët e ekipit kundërshtar në shumë raste gjatë viteve të fundit, me një incident në Valencia në maj që shkaktoi zemërim në mbarë botën.
Spanja do të përballet me Brazilin e Vinicius në Santiago Bernabeu të martën nën sloganin “Një lëkurë” për të ndihmuar në luftën kundër racizmit.
“Unë e kam parë këtë (racizëm) për një kohë të gjatë, dhe ndjehem gjithnje e më i trishtuar dhe dua të luaj më pak”, tha Vinicius në një konferencë shtypi.
Sulmuesi në një moment shpërtheu në lot pasi iu përgjigj pyetjeve në lidhje me abuzimin racist që pësoi në stadiumet anembanë Spanjës.
Megjithatë, Vinicius më vonë tha se nuk do të largohej nga Spanja dhe as qe do të përpiqej të luante në një vend tjetër për t’i shpëtuar abuzimit. “Unë do t’u jepja racistëve atë që duan,” vazhdoi 23-vjeçari. “Unë do të qëndroj në klubin më të mirë në botë, do të shënoj sa më shumë gola të mundem, kështu që ata do të vazhdojnë të më shikojnë”.
Vinicius tha se do të dëshironte që ai të mund të mendonte vetëm për karrierën e tij të lojës. “Të luash futboll është shumë e rëndësishme, por lufta kundër racizmit është jashtëzakonisht e rëndësishme,” tha ai, duke shtuar: “Unë dua që zezakët të kenë një jetë normale dhe nëse do të ishte kështu, unë do të shkoja në ndeshje me klubin tim të fokusuar në lojë”. /Informim
