Prokuroria e Posaçme SPAK, ka vendosur te marre të pandehur edhe bashkëjetuesen e ish zv/kryeministrit, Arben Ahmetajt Erjola Hoxha.
Diten e djeshme iu komunikua akuza për “fshehje dhe mos deklarim të pasurisë”, si dhe “pastrim të produkteve të veprës penale” ish bashkëshortes së tij, Albina Mançka
E njëjta akuzë iu komunikua avokatëve mbrojtës të bashkëjetueses aktuale të ish numrit dy të qeverisë.
Akuzat iu komunikuan avokatëve të Erjola Hoxhës dje, ndërsa hetimet vijojnë deri më datë 22 qershor 2024.
Prokuroria e Posaçme ka të sekuestruara dy vila, në Palasë dhe një në Hamallaj, llogari bankare, disa apartamente, mes tyre edhe atë në të cilin jeton ish bashkëshortja e Ahmetajt, me argumentin se janë produkte të korrupsionit.
Arben Ahmetaj dhe bashkëjetuesja e tij ndodhen jashtë Shqipërisë, që prej korrikut 2023 kur GJKKO miratoi masën e sigurisë “arrestit në burg” ne mungese.
Diten e djeshme SPAK u ka komunikuar avokatëve akuzat për Arben Ahmetajn, Mirel Mërtirin dhe Klodian Zoton pasi të tre ndodhen në arrati.
Ndaj ish zv. Kryeministrit jane ngritur akuzat për korrupsion në 6 raste, pastrim parash dhe fshehje e mosdeklarim pasurie.
Në dosjen hetimore, Prokuroria e Posaçme SPAK pretendon se Arben Ahmetaj, në pozicionin e ministrit të Zhvillimit Ekonomk, Tregtisë e Sipërmarrjes, ka përfituar një vilë në bregdet dhe gati 500 mijë euro si ryshfet nga biznesmenët e inceneratorëve.
Sipas SPAK, vlerat janë përfituar në mënyrë të drejtëpërdrejtë ose të tërthortë nga Ahmetaj, përmes pagesave nga persona të tjerë, por burimi i parave ishte Klodian Zoto e Mirel Mërtiri.
Në episodin e parë SPAK flet për një shumë prej 170 mijë euro, në vitet 2016-2017. Natyra e vërtetë e burimit, sipas SPAK, është mbuluar duke u paraqitur si pagesë e bërë Arben Ahmetajt dhe ish-bashkëshortes së tij, përkundrejt një shitjeje ndaj një personi tjetër të dy apartamenteve 124 dhe 148 m2 në Selitë. Sipas SPAK, paratë janë paguar tërthorazi nga Klodian Zoto e Mirel Mërtiri.
Episodi i dytë i përket vilës 98 m2 dhe sipërfaqes së truallit 521 m2 në Hamallaj, aktualisht e sekuestruar. SPAK thotë se pasuria është përfituar nga Zoto e Mërtiri, e më pas në mënyrë të tërthortë është kaluar me emër të personit me iniciale G.K. e në përfundim të Eriola Hoxhës, bashkëjetueses së ish-zv/kryeministrit.
Një shumë prej 130 mijë euro dhe një tjetër prej 140 mijë euro janë episodi i tretë e i katërt, regjistruar në vitin 2017-2018. Sipas SPAK, pagesa është dokumentuar si shumë e marrë nga Ahmetaj dhe ish-bashkëshortja për shitjen e një apartamenti në Selitë. Ndonëse si pagues figurojnë persona të tjerë, për SPAK, pas tyre ishin Klodian Zoto e Mirel Mërtiri dhe shoqëria “Integratet Technology Services”, shoqëria që më pas ndërtoi inceneratorin e Elbasanit.
Episodi i pestë i dyshuar i korrupsionit ka të bëjë me një shumë prej 34 mijë euro, pagesa direkte nga dy biznesmenët Zoto e Mërtiri për Arben Ahmetajn e të afërm të tij, si shpenzime për pagesa hotelesh dhe udhëtime në vitet 2013-2017. Ndërsa episodi i fundit, i takon një shume prej gati 2 milionë lekë të rinj, në vitet 2019-2020.
Ato kanë qenë pagesa ndaj subjekteve të ndryshme tregtare nga Zoto e Mërtiri përmes shoqërisë “Integrated Technology Services”, në funksion të një investimi në një apartament në pronësi të Arben Ahmetajt në zonën e “Shallvareve” në Tiranë.
