Ministria e Mjedisit, Planifikimit Hapësinor dhe Infrastrukturës (MMPHI), ka marrë një masë ndaj kryetarit të Komunës së Pejës, Gazmend Muhaxherit dhe ndaj Drejtorisë për Punë Komunale dhe Shërbime Publike të kësaj komune.
Një gjobë në shumën prej dy mijë eurosh është shqiptuar personalisht për Muhaxherin, dhe një tjetër për Drejtorinë, si pasojë e dëmeve të shkaktuara në Grykën e Shushicës
Ky veprim nga MMPHI është bërë publik nga Jeton Raka, këshilltar i Ministrit Aliu.
“Zero tolerancë ndaj secilit që e shkel ligjin,” shprehet Raka në postim, ku po ashtu përmenden bazat ligjore të vendimit për gjobë.
Ai tha se “shkeljet flagrante që janë bërë në zonën e Parkut Kombëtar ‘Bjeshkët e Nemuna’, konkretisht tek Gryka e Shushicës” i është dhënë kujdes i veçantë nga Inspektoriati i Mjedisit, ku janë konstatuar ndërhyrjet ilegale dhe dëmtimi i biodiversitetit
Drejtorisë për Punë Komunale dhe Shërbime Publike të Pejës i është shqiptuar një gjobë e rëndë prej 10 mijë eurove, ndërsa Muhaxherit dy mijë euro.
Vendimi vjen pasi kjo drejtori dyshohet se ka kontraktuar një ndërmarrje private për hapjen e një trase për shtrirjen e gypave të furnizimit me ujë pa lejen e nevojshme mjedisore nga MMPHI.
Aktvendimi vë në dukje “ndërhyrjet në zonën e mbrojtur si gërmime të masës shkëmbore dhe dëmtim të biodiversitetit”, duke theksuar se këto veprime kanë shkaktuar edhe pengim të rrjedhës normale të ujit në atë zonë.
