Presidenti serb Aleksandar Vuçiq tha se ka pak shanse për të ndaluar miratimin e Rezolutës për Srebrenicën në Asamblenë e Përgjithshme të OKB-së.
Megjithatë, ai shpall një luftë të ashpër në përpjekje për të ndaluar miratimin e Rezolutës.
Presidenti i “Shoqatës së Viktimave dhe Dëshmitarëve të Gjenocidit” Murat Tahiroviq tha për Vijesti.ba se “sasia e energjisë që Presidenti i Serbisë investon për të dëshmuar, mbi të gjitha për publikun serb, se nuk është kryer gjenocid në Srebrenicë, thjesht fillon të acarojë sjelljen e bashkëpunëtorit në krim”.
“Fakti që ai vetë ishte pjesë e fushatës vullnetare në Bosnje, fakti që ishte i vetmi që bëri thirrje publike për vrasjen e njëqind muslimanëve për një serb, tregon se sa demokrat është Vuçiqi”, thotë Tahiroviq.
Ai shton se “shkuarja në Nju Jork për të parandaluar miratimin e Rezolutës për gjenocidin në Srebrenicë, e cila bazohet në gjykimet e gjykatave ndërkombëtare të themeluara nga OKB-ja, është fundi i vlerave njerëzore”.
“Krahas kësaj, Serbia iu bashkua vendeve të Ballkanit dhe miratoi një Rezolutë, e vërteta është pak më ndryshe nga të tjerat, por në atë Rezolutë Kuvendi i Serbisë i pranon të gjitha aktgjykimet e gjykatave ndërkombëtare”, thotë Tahiroviq dhe shton:
“Pse dhe për shkak të kujt apo çfarë, presidenti i Serbisë tani po përpiqet të kundërshtojë miratimin e rezolutës për gjenocidin në Srebrenicë, kjo ndoshta për të është e qartë. Natyrisht, rezoluta do të miratohet, sepse ajo është një pasuri e qytetërimit. Përpjekjet tuaja janë të kota, lojtarë”