Barcelona synon të këndellet nga eliminimi nga Liga e Kampionëve në mënyrën më të mirë të mundshme, duke mposhtur rivalët e përjetshëm, Real Madridin, në “El Clasicon” e fundit të sezonit.
Derbi mes tyre do të zhvillohet nesër në “Santiago Bernabeu” dhe kjo ndeshje mund t’i japë fund garës për titull në La Liga, transmeton Gazeta Express.
Robert Lewandowski beson se ata mund ta ngushtojnë diferencën e pikëve ndaj Real Madridit.
“El Clasico është gjithmonë një lojë e veçantë, jo vetëm për ne, por për të gjithë njerëzit në botë. Për të gjithë ata që presin këtë lojë, shpresoj që të tregojmë futboll për tifozët nëpër botë dhe ne jemi gati ta fitojmë këtë lojë”, tha ai për “La Liga World”.
Sulmuesi polak beson gjithashtu se Barcelona – e cila është e pamposhtur në 10 ndeshjet e fundit të ligës – po shkon në drejtimin e duhur, pas një lëkundjeje masive në mes të sezonit.
“Nga njëra anë ne respektojmë vendimin e tij [Xavi] dhe tani jemi të fokusuar vetëm për këtë sezon sepse e dimë se është shumë i rëndësishëm. Ne kemi rregulluar disa probleme dhe sfida që kemi pasur dhe mënyra tani është shumë, shumë e mirë dhe ne jemi ende duke luftuar, ende duke u përpjekur të fitojmë çdo ndeshje dhe ne përpiqemi ta bëjmë këtë deri në fund të sezonit”, tha “Lewa”.
35-vjeçari foli gjithashtu për “armët e reja” të Barcelonës, të cilët kanë qenë të shkëlqyer deri më tani. Për më tepër, ai zbuloi se pret të luajë përkrah tyre edhe për dy vitet e ardhshme.
“Më ndihmon shumë të flas me lojtarët më të rinj, me Lamine, Fermin Lopez, Hector (Fort) gjithashtu dhe Pau (Cubarsi), ata janë të gjithë të mrekullueshëm. Jam shumë i lumtur dhe ndihem shumë mirë dhe gjithashtu në rrugën që po shkojmë tani mendoj se kemi gjetur rrugën tonë. Fizikisht ndihem shumë mirë, që do të thotë se mund të luaj në një nivel të lartë dhe jam i sigurt se për dy vite do të krahasohem me lojtarët e tjerë”, deklaroi Lewandowski.
