Presidenti Joe Biden nënshkroi sot një projekt-ligj që mund të ndalojë TikTok të operojë brenda Shteteve të Bashkuara që në fillim të vitit të ardhshëm.
Pas vitesh përpjekjesh, Dhoma e Përfaqësuesve dhe Senati arritën të miratonin një masë që do ta detyronte TikTok të largohej nga “Bytedance” brenda një viti, ose të përballet me një ndalim në mbarë vendin. Projektligji ishte pjesë e një pakete më të madhe ndihme të huaj që ofron ndihmë për Ukrainën, Izraelin dhe Tajvanin, duke e bërë të vështirë për disa ligjvënës votimin kundër tij. Ndihma për Ukrainën ka qenë një pjesë kyçe e agjendës së Bidenit që kur Rusia pushtoi në vitin 2022, dhe javën e kaluar ai miratoi publikisht paketën e ndihmës.
Veçanërisht, deklarata e Biden në mbrëmjen e së martës, duke iu përgjigjur votimit të Senatit, nuk përmendi fare TikTok, në vend të kësaj zgjodhi të nënvizonte ndihmën e huaj prej 95 miliardë dollarësh të përfshirë në projekt-ligj.
“Kongresi ka miratuar legjislacionin tim për të forcuar sigurinë tonë kombëtare dhe për t’i dërguar një mesazh botës për fuqinë e lidershipit amerikan: ne qëndrojmë me vendosmëri për demokracinë dhe lirinë, dhe kundër tiranisë dhe shtypjes,” ka thënë Biden.
“Ky ligj antikushtetues është një ndalim i TikTok dhe ne do ta kundërshtojmë atë në gjykatë. Ne besojmë se faktet dhe ligji janë qartazi në anën tonë dhe në fund do të mbizotërojmë. Fakti është se ne kemi investuar miliarda dollarë për të mbajtur të dhënat e SHBA-së të sigurta dhe platforma jonë është e mbrojtur nga ndikimi dhe manipulimi i jashtëm”, tha një zëdhënës i TikTok në një deklaratë të mërkurën.
“Ky ndalim do të shkatërronte 7 milionë biznese dhe do të heshtte 170 milionë amerikanë, ne do të vazhdojmë të investojmë edhe duke përmirësuar shërbimet për të siguruar që TikTok të mbetet një hapësirë ku amerikanët e të gjitha sferave të jetës mund të jenë të sigurtë për të ndarë përvojat e tyre, për të gjetur gëzim dhe për t’u frymëzuar.”
CEO i kompanisë Shou Zi Chew publikoi një TikTok të mërkurën duke e quajtur ligjin një “ndalim”.
“Kongresi miratoi një projekt-ligj të cilin e ka nënshkruar presidenti i cili synon të ndalojë TikTok në Shtetet e Bashkuara,” tha Chew. “Mos bëni gabim, ky është një “ndalim”. Një ndalim për TikTok dhe një ndalim për ju dhe zërin tuaj.”
Qeveria kineze ka treguar më parë se nuk do të miratonte një shitje të kompanisë TikTok dhe ka vendosur kontrolle të eksportit në algoritmin e kompanisë.
Kjo është një ngjarje në zhvillim…../Wired
