I dërguari i Shteteve të Bashkuara të Amerikës për Ballkanin Perëndimor, Gabriel Escobar, ka reaguar ndaj raporteve të fundit se ai është shkarkuar nga detyra për shkak të lidhjeve të dyshimta me qeverinë serbe.
Gjatë një bisede me gazetarë, Escobar pretendimet ndaj tij i ka quajtur dezinformata
“Para se të largohem, dua të adresoj një çështje që ka shkaktuar shumë pyetje. Dezinformimi i pabazuar që u përhap nga një gazetar i supozuar gjatë fundjavës, i cili pretendoi se kam lidhje të dyshimta me qeverinë serbe, është thjesht një gënjeshtër e verifikueshme”, tha Escobar.
Escobar vazhdoi duke sqaruar se nuk është shkarkuar nga pozita e tij dhe se Departamenti i Shtetit ka konfirmuar qëndrimin e tij.
Ai gjithashtu hodhi poshtë akuzat që gruaja e tij përfiton financiarisht nga qeveritë e huaja, duke theksuar se ajo ka vepruar si një përkrahëse krenare për ndërveprimet mes njerëzve pa marrë ndonjë pagesë
“Gruaja ime nuk merr para nga asnjë qeveri e huaj. Gruaja ime në çdo ambasadë në të cilën kemi shërbyer – në Bolivi, Portugali, Itali, madje edhe Serbi – ka qenë një përkrahëse krenare e kontakteve mes njerëzve, por ajo e bën këtë pa asnjë lloj pagese dhe pa asnjë lloj kontrate. Ajo do të vazhdojë ta bëjë këtë”, vazhdoi ai.
Escobar mohoi gjithashtu pretendimin se informacioni kishte dalë nga burimet e Kongresit, duke theksuar se raportet për një ndryshim të personelit nuk i ishin bërë të ditura organeve ligjvënëse.
Ky sqarim vjen pasi Escobar njoftoi qeveritë e rajonit përmes kanaleve diplomatike për një tranzicion në postin e tij.
Ai e lidhi daljen e raporteve me njoftimin e bërë Qeverisë së Kosovës dhe e quajti këtë lloj dezinformimi si një problem për keqardhje që propagandohet në Ballkanin Perëndimor
“Pretendimi se informacioni erdhi nga burime të kongresit është i rremë sepse Kongresi nuk është njoftuar për ndonjë ndryshim personeli. Në fakt, raporti doli pasi unë përmes kanaleve diplomatike u drejtova të gjitha qeverive të rajonit për të filluar të flitej për tranzicionin. Dhe ky raport doli menjëherë pasi ia komunikova Qeverisë së Kosovës”.
“Pra, është ky lloj dezinformimi që është për të ardhur keq që po propagandohet në Ballkanin Perëndimor, dhe gjithashtu – mund të shtoj – një nga arsyet pse konteksti mediatik në Kosovë është kritikuar kaq shumë nga gazetarë të pavarur dhe organizata të pavarura”, u shpreh Escobar.
Tutje ka shprehur mirënjohje për mbështetjen që më ka dhënë Departamenti i Shtetit si dhe gazetarët që kanë hedhur poshtë këto gënjeshtra që synojnë të hedhin dyshim mbi angazhimin e tij ndaj Ballkanit
Escobar përfundoi duke theksuar angazhimin e tij të vazhdueshëm dhe të palëkundur për punën në Ballkan dhe për ndërtimin e marrëdhënieve të forta rajonale
