Në emisionin EURO n’T7 është diskutuar për hulumtimin e Institut Ndërkombëtar Republikan i cili ka nxjerr të dhëna se brengat kryesore të kosovarëve janë ekonomia, papunësia, kosto e lartë e jetesës, çmimet e larta dhe korrupsioni.
Sipas këtij hulumtimi për 29% e kosovarëve brengë kryesore është ekonomia dhe papunësia e lartë ndërsa për 28% problem kryesor mbetet kosto e jetesës dhe çmimet e larta.
Po sipas këtij hulumtimi vetëm për 2% e kosovarëve brengë kryesore mbeten problemet politike.
Kjo sipas Agim Shahinit, kryetar i Aleancës Kosovare të Bizneseve tregon për gjendjen e rëndë ekonomike në të cilën gjendet qytetarët tanë dhe poashtu tregon se qeveria aktuale nuk është marr fare me problemet ekonomike të tyre.
Shahini thotë se kur qeveria nuk bënë zgjidhje për problemet e qytetarëve atëherë ata kërkojnë zgjedhje dhe zgjedhja e qytetarëve duhet të jetë programi ekonomik e social i partive politike e jo programet me propagandë patriotike.
“Derisa tash po flitet për zgjedhje të reja, qytetarët kur të shkojnë tek kutit e votimit duhet të japin votën për atë parti politike që bënë zgjidhjen më të mirë ekonomike. Secili qeveria në të kaluarën është mbajtur mend për diçka, qoftë për investime në infrastrukturë apo rritje të pagave, qeveria aktuale tërë energjinë e saj e ka koncentruar në dialog me Serbinë dhe i ka lënë anash investimet kapitale dhe çështjet ekonomike dhe me këtë ka rritur pakënaqësitë sociale, kjo pastaj ka rritur dëshirën e qytetarëve për të emigruar ku vetëm në katër vitet e fundit mbi 200 mijë kosovar e kanë lëshuar vendin”, ka thënë Shahini.
Në anën tjetër profesoresha e Fakultetit Ekonomik, Sevdie Alshiqi Bekteshi ka thënë se qytetarët duhet të bëjnë zgjedhje ekonomike sepse qytetarët janë varfëruar tashmë dhe dëmi është bërë.
“Me një zgjedhje të mirë politike ku sigurohet një stabilitet politik mund të garantohet zhvillim i qëndrueshëm ekonomik. Qytetarët me patjetër duhet të shohin programet ekonomike të partive dhe t’i vlerësojnë ato se a mund të realizohen, ngase tashmë varfëria ka prekur shumë njerëz në vendin tonë. Edhe në të kaluarën ka pasur programe të shkruara mirë por që realizimi i tyre nuk ka ndodhur, kështu që qytetarët duhet të vlerësojnë para se të votojnë se cili program është realist i cili do të rrit mirëqenien e tyre”, ka shtuar profesoresha Alshiqi.
Sipas tyre qytetarët nuk duhet të votojnë për liderin por për programin ekonomik sepse shumë herë duke votuar liderin e injoruar e jo programin ekonomik qytetarët vetëm se janë varfëruar./T7
