Hisen Berisha nga PDK-ja ka shprehur mbështetjen e tyre për shpërndarjen e Kuvendit, ndërsa Pal Lekaj nga AAK-ja është kundër kësaj. Lekaj ka theksuar se paraprakisht duhet të ndodhë dorëheqja e kryeministrit Albin Kurti, përderisa Berisha ka thënë se shpërndarja e Kuvendit është zgjidhja e duhur për situatën e tanishme politike
Partia Demokratike e Kosovës (PDK) dhe Aleanca për Ardhmërinë e Kosovës (AAK), kanë qëndrime të ndara lidhur me shkuarjen në zgjedhje të parakohshme.
Hisen Berisha nga PDK-ja ka shprehur qëndrimin e partisë se janë pro shpërndarjes së Kuvendit, ndërsa Pal Lekaj nga AAK-ja ka deklaruar se janë kundër kësaj.
“Pro shpërndarjes, dhe gjitha opsionet tjera na dërgojnë në formulë kushtetuese, të cilat pastaj i japin mundësinë Kurtit që t’i fusë në lojë partitë parlamentare dhe të blejë në kohë për ta përmbyllur mandatin”, ka deklaruar Berisha.
“Kurti, nëse dëshiron zgjedhje, le të japë dorëheqje”
Në anën tjetër, Lekaj në “Debat Plus”, ka theksuar se “AAK-ja e ka bërë të qartë se është kundër shpërndarjes së parlamentit. Kurti o ka don me i ik përgjegjësisë dhe dështimeve që i ka bërë për këtë mandat dhe po don me hedh fajin te parlamenti i Kosovës që është e padrejtë.”
Lekaj ka shtuar se së pari duhet të ndodhë dorëheqja e kryeministrit Albin Kurti, “e dimë që nuk bëhet, por ky është qëndrimi i Aleancës”.
