Presidenti Putin është përbetuar se do t’i përgjigjet dhëmb më dhëmb të gjitha sanksioneve të Perëndimit për shkak të luftës në Ukrainë dhe deri në këto momente e ka mbajtur me përpikmëri këtë zotim.
Gjatë së mërkurës, lideri rus, miratoi një ligj i cili do të lejojë konfiskimin e aseteve, letrave me vlerë dhe pronave që iu përkasin shtetasve amerikanë në Rusi, të cilat do të përdoren të kompensuar dëmet e shkaktuara ndaj manjatëve rusë dhe Bankës Qendrore nga i njëjti veprim i SHBA.
Pak kohë më parë, presidenti amerikan Joe Biden, nënshkroi një ligj që mundësonte konfiskimin e rreth 5 miliardë dollarëve asete ruse në SHBA, të cilat më pas u përdorën për paketën e ndihmës për Ukrainën, Tajvanin dhe Izraelin.
Edhe Bashkimi Evropian ka miratuar një vendim që i mundëson bllokut evropian të përdorë asetet e ngrira të Bankës Qendrore ruse, që gjenden në BE.
Brukseli ka thënë se përfitimet nga këto asete do të përdoren për të ndihmuar ushtrinë e Ukrainës, e cila po përballet me pushtimin e nisur nga Rusia më 2022.
