Një unazë tepër e vjetër është gjendur në Jeruzalem. Është e mundur që unaza të sjellë njohuri të reja për origjinën e Jeruzalemit. Ishte zbukuruar me një gur të çmuar të kuq dhe besohet se i përkiste ose një fëmije ose një vajze.
E ka origjinën nga epoka helenistike, njoftoi shërbimi kompetent izraelit.
Një punëtor e gjeti unazën duke shoshitur dheun. Punëtori është pjesë e ekipit që punon në gërmimet arkeologjike të iniciuara bashkërisht nga Instituti i Izraelit për Antikitetet dhe Universiteti i Tel Avivit.
Në kantierin “Qyteti i Davidit” kryhen gërmime.
“Papritmas pashë diçka që shkëlqente”, tha punëtori. “Menjëherë bërtita se e kisha gjetur unazën”. Punëtori shtoi se i gjithë ekipi ishte i emocionuar,
“Është një pjesë shumë emocionuese, nuk e gjen diçka të tillë çdo ditë”. Ai më pas tha se në të vërtetë gjithmonë donte të gjente diçka prej ari. “Jam shumë i lumtur që ëndrra ime u realizua”.
Unaza tregon një histori të re për Jerusalemin
Stili i unazës tregon epokën persiane dhe helenistike të hershme të fundit të shekullit të 4-të deri në fillim të shekullit të 3-të para Krishtit.
“Në atë kohë, njerëzit filluan të preferonin arin me gurë të çmuar mbi arin e gdhendur”, thuhet në deklaratë. Unaza e artë është një nga një sërë objektesh dhe strukturash të gërmuara, të cilat u gjetën në kantierin e parkingut Givanti në “Qytetin e Davidit”.
Shkencëtarët pjesëmarrës në projektin e gërmimeve thonë se të gjitha këto gërmime do të kontribuojnë në krijimin e një tabloje ndryshe të banorëve të Jeruzalemit në epokën e hershme helenistike.
Për shkak se strukturat e mëparshme dhe objektet e gërmuara të asaj periudhe ishin të rralla, studiuesit supozuan se Jerusalemi ishte atëherë një qytet i vogël, i kufizuar në majën e shpatit juglindor – “Qyteti i Davidit” – dhe kishte burime të kufizuara, shkruan DW.
Tani shkencëtarët i interpretojnë ndërtesat e gërmuara dhe objektet e arit si një tregues se ekonomia ishte në lulëzim dhe se qyteti mund të kishte edhe një status elitar në atë kohë.
