Trajneri i Gjermanisë, Julian Nagelsmann, ka quajtur “racist” një sondazh të fundit të zhvilluar në televizionin publik gjerman, ARD, nëse njerëzit do të donin të shihnin më shumë lojtarë të bardhë në skuadrën kombëtare të futbollit. 21% e të pyeturve i ishin përgjigjur pozitivisht kësaj pyetjeje.
“Është raciste. Mendoj se duhet të hapim sytë. Shumë njerëzve në Europë iu është dashur të largohen në kërkim të një vendi të sigurt”, tha Nagelsmann të dielën në një konferencë për mediat para miqësore me Ukrainën, këtë të hënë. Një ditë më parë, sondazhi ishte etiketuar si racist edhe nga mesfushori Joshura Kimmich. “Edhe unë e mendoj saktësisht kështu. Pyetja është çmenduri”.
Karl Valks, drejtori sportiv në ARD që kishte miratuar kryerjen e sondazhit tha se rezultati është tronditës, por pasqyron situatën sociale në Gjermani. “Sporti luan një rol të rëndësishëm në shoqërinë tonë dhe skuadra kombëtare është shembull i fortë i integrimit”, u citua ai nga mediat gjermane.
Skuadra e Gjermanisë momentalisht ka disa lojtarë me origjinë të ndryshme, përfshi kapitenin Ilkay Gündogan dhe mesfushorin Leroy Sané.
Rezultatet e sondazhit dalin pak javë pasi Adidas u detyrua të mos pranonte më kërkesa për të printuar fanella me numrin 44, pasi fonti i numrit e bënte të ngjante me simbolin e forcave SS të Nazistëve./A2cnn
