Kryetari i AKR-së, Behgjet Pacolli tha se është “e papranueshme” që kryeministri i Shqipërisë, Edi Rama të vijë për vizitë në Kosovë dhe të mos pritet në takim nga homologu i tij, Albin Kurti.
Pacolli shkroi në Facebook se është “i shqetësuar se dikush në Kosovë po tenton të denigroi figurën e Edi Rames”.
“Shqiptarët shquheshin për mirësinë dhe mikpritjen e tyre, veçanërisht në shtëpitë e tyre. Është e papranueshme që një kryeministër i rëndsishëm si Edi Rama të vijë për vizitë në Kosovë dhe homologu i tij kosovar të mos ketë kohë për një takim qoftë edhe të shkurtër!”, shkroi Pacolli.
“Unë jam i shqetësuar se dikush në Kosovë po tenton të denigroi figurën e Edi Rames. Për këtë të fundit kam vetëm një pyetje, kush ishte lideri i fundit shqiptar, ballkanik apo botëror që publikisht, duke e parë në sy mikpritësin e tij, në Beograd, përseriti disa herë se “Kosova është shtet i pavarur”!!!! Kryeministër Rama, Kosova dinjitoze i di vlerat e tua!!!”, shtoi ai
