Djali i presidentit të Serbisë, Danilo Vuçiq, ndodhet në Gjermani për Kampionatin Evropian dhe aty, sipas mediave evropiane, ka qenë dëshmitar i një përleshje brutale mes tifozëve në Gelsenkirchen para ndeshjes Serbi-Angli.
Dhe jo vetëm që ka marrë pjesë, por, sipas mediave të huaja, ka dashur të përfshihet në përplasjen fizike, por anëtarët e “Cobra” e kanë penguar.
Para ndeshjes ndërmjet Serbisë dhe Anglisë në Gelsenkirchen, karriget, sendet dhe grushtat kanë fluturuar në një lokal kur tifozët serbë dhe anglezë sulmuan njëri-tjetrin, transmeton portali gjerman T-Online. Danilo Vuçiq, djali i presidentit serb, Aleksandar Vuçiq, “qartë” ka dashur të përfshihet, “i cili akuzohet se ka lidhje të ngushta me skenën e huliganëve kriminalë”.
Pamjet dokumentojnë, shkruan portali gjerman, se një burrë, dyshohet se 26 vjeç, po pengohet nga ndjekësit të përfshihet në sherr. Në atë moment, grupi qëndron ende përpara një restoranti arab, vetëm dy godina larg Steakhouse në zonën e këmbësorëve ku ndodhi konfrontimi.
Sipas mediave kroate dhe boshnjake, shkruan T-Online, djali i presidentit të Serbisë është frenuar nga pjesëtarët e njësisë speciale “Cobra”.
Gjatë kësaj kohe, efektivë të policisë së provincës së Nordrhein-Westfalisë me një ndërhyrje të shpejtë parandalojnë përshkallëzimin e situatës. Shtatë tifozë serbë janë arrestuar dhe paditur për shkak të lëndimit të rëndë trupor.
Përhapja e Belivuk
Danilo Vuçiq ishte i “shoqëruar nga huliganë të njohur serbë” në Kupën e Botës 2018 në Rusi, shkruan T-online dhe se “huliganët serbë konsiderohen veçanërisht të dhunshëm në qarqet ndërkombëtare”. Portali gjerman më pas kujton rastin e Veljko Belivuk dhe raporton se ai gjatë seancës ka thënë se ka organizuar demonstrata për Aleksandar Vuçiqin dhe ka thyer protestat e opozitës.
Vuçiq dyshohet se nuk i është përgjigjur pyetjes së programit të parë të shërbimit publik gjerman ARD për të gjitha këto.
Më tej T-Online shkruan se Danilo Vuçiq shihet duke përqafuar një nga bashkëpunëtorët e Belivuk-ut në një foto të mëparshme. Kur portali serb Krik ka shkruar për ato marrëdhënie, shkruan portali gjerman, edhe presidenti serb Aleksandar Vuçiq ka postuar një foto në Instagram me djalin e tij dhe mbishkrimin: “Djali im Danilo është një i ri i ndershëm dhe i denj”, dhe po sulmohet vetëm pse është djali i presidentit të Serbisë”.
Për faktin se djali i presidentit të Serbisë ka qenë i pranishëm në momentin kur ka ndodhur konflikti mes tifozëve ka shkruar edhe britanikja Sun, duke theksuar se truprojat e kanë penguar të ndërhyjë në konflikt.
“Videoja tronditëse duket se tregon momentin kur Danilo Vuçiq përleshet me sigurimin e tij teksa tenton të hidhet në sherr mes ultrasve serbë dhe tifozëve të Anglisë”, shkruan ndër të tjera mediat britanike.
Lajmet iu referuan një regjistrimi të publikuar në rrjetin X nga Jakub Bielamowicz, nga Instituti i Evropës së Re.
Në postimin e përmendur në X, shkruhet se Danilo Vuçiq ka lidhje me lëvizjen ultras serbe, një grup i organizuar tifozësh për të mbështetur ekipet sportive, kryesisht klubet e futbollit, si dhe me grupet ekstremiste dhe botën e krimit.
Kohë më parë, gazeta amerikane “New York Times” ka shkruar për lidhjet e presidentit serb Aleksandar Vuçiç me njerëzit e krimit në Serbi.
Artikulli i gazetës amerikane fillon me përshkrimin e konferencës për media që në vitin 2021 kishte mbajtur Vuçiç.
Aty ku kishte shpalosur arrestimin e një bande të krimit në Serbi. E që në fakt doli që kjo bandë kishte lidhje me presidentin Vuçiq dhe djalin e tij Danilo Vucic. Dhe ishte organizuar pikërisht për nevojat dhe me urdhër të presidentit serb.
Bëhet fjalë për kreun e bandës i cili ishte trafikant kokaine i quajtur Veljko Belivuk. Tashmë një figurë e njohur në Beograd. Ai ishte akuzuar më parë për vrasje dhe një sërë krimesh të tjera të rënda. Por kurrë nuk kaloi shumë kohë në burg.
Pas arrestimit të kreut të bandës, Belivuk përshkroi disa nga punët e pasme që banda pretendonte se kishte bërë për qeverinë. Si frikësimi i rivalëve politikë dhe ndalimi i tifozëve që të këndonin kundër Vuçiçit në ndeshjet e futbollit.
Një shërbim i vlefshëm në një vend ku stadiumi mund të bëjë ose të prishë një president. Belivuk paralajmëroi se nëse Vuçiç “vazhdon procedurat e tij kundër meje”, ai do të kishte shumë më tepër për të thënë, thuhet tutje në hulumtim.
Këto akuza të kreut të bandës, sipas NYT, presidenti serb Aleksandar Vuçiç i kundërshtoi me zemërim. Sipas gazetës prestigjioze rasti Belivuk ka hapur një dritare drejt një të ardhmeje të zymtë të mundshme. Në të cilën Vuçiq minon projektin evropian nga brenda, duke ndërtuar një shtet ku demokracia është një fasadë. Dhe bandat kriminale përdoren për të përhapur frikën.
Sipas gazetës e njëjta taktikë ishte përdorur nga njerëzit që e futën Ballkanin në një luftë katastrofike tre dekada më parë. Kreu i bandës para gjykatës kishte folur për një takim që pretendonte se kishte pasur me Vuçiqin. Takim që u zhvillua në një shtëpi private në Beograd. Duke dhënë adresën e rrugës dhe numrin e banesës dhe emrin e pronarit.
Ata u takuan atje vetëm një herë, shtoi ai: “sepse, siç tha shefi, nëse dikush na shihte ose na filmonte, nuk do të ishte mirë për të”.
“Vuçiç tani ushtron pothuajse kontroll total mbi pothuajse çdo aspekt të jetës publike. Nga Parlamenti, gjykatat, policia dhe biznesi. Arrestimi i Belivuk dhe bandës së tij mund të jetë një nga vendimet e pakta kyçe të viteve të fundit që Vuçiç nuk i kontrolloi”, thuhet tutje në hulumtimin e New York Times.
Në hulumtimin e gazetës amerikane thuhet se Vuçiç ishte një mbështetës entuziast i partisë së Sheshelit. Dhe ai shpejt u bë anëtari më i ri i Parlamentit të Serbisë. Në vitin 1995, disa ditë pas masakrës së gati 8,000 myslimanëve boshnjakë rreth Srebrenicës, Vuçiç mbajti një fjalim në të cilin deklaroi:
“Nëse na bombardoni, nëse vrisni një serb, ne do të vrasim njëqind muslimanë”.
Në dekadat që nga ajo kohë, Vuçiç nuk ka kërkuar kurrë falje plotësisht për krimet e kryera në emër të Serbisë. Apo për retorikën e tij. Ai i ka trajtuar si heronj disa kriminelë të dënuar lufte në lirimin e tyre nga burgjet jashtë vendit.
NYT tutje portretizon presidentin Vuçiq si personi që udhëhoqi një grup protestuesish në mbështetje të Ratko Mlladiç. Ky i fundit, komandanti ushtarak i quajtur ndonjëherë Kasapi i Ballkanit. Një vit më vonë, kur lideri serb i Bosnjës gjatë kohës së luftës Radovan Karaxhiç u arrestua, Vuçiç u kthye në rrugë. Aty ku u dhunua nga policia.
Hulumtimi i gazetës amerikane flet edhe për vlerësimin e Freedom House në vitin 2019, i cili e uli Serbinë në vlerësimin vjetor të demokracive nga të lira në pjesërisht të lira. Duke përmendur politizimin e gjyqësorit dhe institucioneve të tjera. Dhe zgjedhjet e mbushura me ngacmime dhe ryshfet.
Megjithatë, aplikimi i Serbisë për t’u anëtarësuar në BE është rrotulluar me qetësi. Sikur burokratët në Bruksel nuk e kanë vënë re se Vuçiç po lëviz në drejtimin e gabuar. Sipas këtij hulumtimi një mjet i rëndësishëm i pushtetit për Vuçiçin janë mediat.
Ai ka përdorur kompaninë shtetërore të telekomunikacionit për të blerë stacione televizive lokale. Dhe aleatët e tij drejtojnë një treshe organizatash mediatike që ndjekin paturpësisht linjën e Partisë Progresive. Dhe i japin kohë të bollshme transmetimit vetë Vuçiqit. Këto përfshijnë një rrjet televiziv të quajtur Pink.
Në dy vitet që nga arrestimi i bandës Belivuk, Vuçiq ka thënë vazhdimisht se rasti shënoi një ndarje vendimtare me të kaluarën.
“Ne do të pastrojmë institucionet shtetërore nga të gjithë bashkëpunëtorët e tyre”, deklaroi ai në konferencën e parë për shtyp pas arrestimeve.
Më pas ai u tha një grupi gazetarësh:
“Kjo është e rëndësishme për ne, por edhe për qytetarët e thjeshtë. Pronarët e restoranteve dhe bareve nuk do të duhet të shqetësohen nëse dikush do të vijë dhe do t’i sulmojë ata dhe më pas kanë frikë ta raportojnë në polici. Sepse nuk e dinë nëse dikush në polici është i lidhur mirë me këta vrasës”.
Gazeta amerikane flet edhe për ndihmën që studiuesi dhe analisti amerikan i quajtur Daniel Serwer ndihmoi në organizimin e paraqitjes së parë publike të Vuçiqit në Uashington, D.C. Serwer punoi në Ballkan në vitet 1990. Dhe ai dinte gjithçka për rrënjët nacionaliste të Vuçiçit.
Por ai ishte i zhgënjyer me të dhënat e liderëve të tjerë politikë serbë.
“Serwer e gjeti Vuçiçin inteligjent dhe serioz. Kishte disa shpresa, më tha ai, se Vuçiç mund të ishte një figurë e “Nixon në Kinë”, e aftë për të sjellë bazën konservatore të partisë së tij në një pajtim më të plotë me fqinjët e Serbisë. Serwer më tha se qëndrimi i tij ndaj Vuçiqit ka ndryshuar rrënjësisht. Vuçiq tani është shumë serioz në lidhje me ‘botën serbe’,” tha ai.
Këto fjalë, të thirrura shpesh nga nacionalistët serbë, përcjellin idenë se Serbia ka të drejtë të dominojë tokat ku jetojnë serbët etnikë, duke përfshirë disa vende fqinje.
“Ai kishte mundësinë të lëvizte në një drejtim pro-Be, dhe ai zgjodhi të mos e bënte”.
