Kryeministri Albin Kurti tha se “është e vërtetë” që ka pasë ikje të trurit nga Kosova, por tha se ka pasë edhe kthim – madje nga brezi i dytë e diasporës që, sipas tij, po punojnë nga Kosova për kompani europiane.
Në konferencën ndërkombëtare “WB6 – Youth for Social Democracy”, ai tha se migrimi duhet të pranohet si fakt dhe thotë se rinia aktualisht është shumë më e lëvizshme sesa që ka qenë shekullin e kaluar
“Po punojmë në ndërlidhjen e arsimit me punësimin sepse pikërisht për shkak të hendekut të shkathtësive, kemi migrimin e të rinjve. Unë besoj që ashtu qysh njerëzit nuk janë për ta ditur vetëm një gjuhë, gjuhën amtare, por dy e më shumë gjuhë, ngjashëm njerëzit nuk do të jetojnë në vendlindje tërë jetën e tyre. Ne duhet ta pranojmë si fakt që njerëzit do të lëvizin dhe lëvizshmëria e qytetarëve ku një pjesë të jetës e kalojnë diku tjetër nuk është doemos e keqe, nuk është doemos e dëmshme”.
“Në Kosovë e kemi dukurinë ku kemi edhe kthim të trurit. Është e vërtetë që ka pasë ikje të trurit, por është e vërtetë që po ka edhe kthim të trurit. Shumë të reja edhe të rinj po punojnë në distancë për kompani europiane nga Kosova, ndërkohë që ata janë brezi i dytë i diasporës. Që nga pandemia e këtej, sektori privat ka krijuar mundësinë që punëtorët të mund të punojnë në distancë dhe këtë po e shfrytëzojnë shumë të reja e të rinj që prindërit i kanë në diasporë, që ata vetë kanë lindur në Gjermani, Zvicër, Skandinavi, Francë apo Britani të Madhe dhe po punojnë nga Kosova ku janë kthyer te gjyshja e gjyshi dhe udhëtojnë shpesh. Është një rini sot që është shumë më e lëvizshme sesa që ka qenë në shekullin e kaluar”.
Kurti tha se ata që shkojnë të studiojnë në Sorbone, Cambridge ose Oxford, “as nuk mund t’i ndalim as nuk duhet t’i ndalim”.
