Një studim i ri novator ka zbuluar se një kimikat i përdorur në ambalazhet plastike të ushqimeve dhe pijeve mund të lidhet drejtpërdrejt me dëmtimin e aftësisë për t’iu përgjigjur insulinës, një hormon që ndihmon në rregullimin e sheqerit në gjak.
Studimi ofron prova të drejtpërdrejta se kimikati bisphenol A ose BPA mund të shkaktojë rezistencë ndaj insulinës tek njerëzit, që do të thotë nivele të larta kronike të sheqerit në gjak dhe një rrezik shumë më të lartë të diabetit të tipit 2, raportoi Business Insider.
Studimi u prezantua në Sesionet Shkencore 2024 të Shoqatës Amerikane të Diabetit. Studiuesit thanë se ky studim tregon se Agjencia Amerikane e Mbrojtjes së Mjedisit (EPA) mund të ketë nevojë të rishqyrtojë kufijtë e sigurt për ekspozimin ndaj BPA në shishet plastike, kutitë e ushqimit dhe kontejnerët e tjerë.
Studiuesit nga Universiteti Shtetëror Politeknik i Kalifornisë studiuan 40 të rritur të shëndetshëm, të cilët u caktuan rastësisht për të marrë ose një placebo ose një dozë ditore të BPA-së të klasifikuar aktualisht si të sigurt nga EPA.
Pas katër ditësh, pjesëmarrësit të cilëve iu dha BPA ishin më pak të përgjegjshëm ndaj insulinës, ndërkohë që grupi placebo nuk pësoi ndonjë ndryshim. “Këto rezultate sugjerojnë se ndoshta doza e sigurt e EPA e SHBA-ve duhet të rishikohet dhe se ofruesit e kujdesit shëndetësor mund t’ua sugjerojnë këto ndryshime pacientëve,” tha Todd Hagobian, autori i lartë i studimit të ri, në një njoftim për shtyp. Shoqata e Ushqimit dhe Barnave e konsideron BPA si të sigurt në nivelet e ulëta që ndodhen në kontejnerët e ushqimit, deri në 5 mg për kg peshë trupore në ditë, ose 100 herë më shumë se sasia që studimi i ri zbuloi se ishte e rrezikshme.
Disa studiues argumentojnë se udhëzimet e FDA janë të vjetëruara. Ndërkohë, Komisioni Evropian ka propozuar ndalimin e BPA në produktet që janë në kontakt me ushqime ose pije deri në fund të vitit 2024. Për më tepër, studime të tjera të fundit tregojnë se mikroplastika, grimcat e vogla që mund të depërtojnë në qelizat njerëzore, mund të dëmtojnë potencialisht shëndetin e njeriut. Këto grimca gjenden në pjesë të ndryshme të trupit, duke përfshirë mushkëritë dhe organet riprodhuese.
