Në gjykimin ndaj tre të akuzuarve Kastriot, Kreshnik dhe Halil Mehmetaj, për vrasjen e trefishtë në Gllogjan, të martën, trupi gjykues ka aprovuar shumicën e propozimeve të mbrojtjes për dëgjimin e dëshmitarëve të rinj, si dhe propozimin e prokurores Sahide Gashi për dëgjimin e një eksperti.
Në seancën e kaluar, prokurorja Sahide Gashi dhe mbrojtësit e të akuzuarve Kastriot, Kreshnik dhe Halil Mehmetaj, avokatët Kosovare Kelmendi, Sylë Lokaj dhe Florent Latifaj, kanë propozuar dëshmitarë të rinj që të dëgjohen në këtë gjykim, raporton “Betimi për Drejtësi”.
Prokurorja Gashi, në seancën e së martës i ka kundërshtuar propozimet e mbrojtësve per dëgjimin e dëshmitarëve të propozuar, si dhe administrimin e provave të reja të propozuara po ashtu nga mbrojtja.
Trupi gjykues i kryesuar nga gjyqtarja Violeta Husaj-Rugova, pas konsultimit mori vendim që të refuzohet propozimi i Prokurorisë për dëgjimin e hetuesve Faton Morina, Bekim Gashi, Rifat Gashi dhe Hamit Reçica
Dëgjimi i këtyre dëshmitarëve u refuzua me arsyetimin se nuk janë rrethanat që të njëjtit të dëshmojnë, ndërsa sa i përket veprimeve të tyre se si kanë ardhur deri të sigurimi i provave, trupi gjykues theksoi se janë në shkresa të lëndës.
Ndërsa, u aprovua propozimin e prokurores Gashi për dëgjimin e ekspertit Nikolin Duraj, ekspert pranë Drejtorisë së Përgjithshme Policore të Shtetit, në Tiranë.
Më pas, gjykata ka aprovuar edhe propozimin e mbrojtëses së të akuzuarit Kastriot Mehmetaj, avokates Kosovare Kelmendit, që në cilësinë e dëshmitarëve të dëgjohen Cyme Mehmetaj dhe Iliriana Berisha, si dhe eksperti i balistikës nga Instituti i Forenzikës në Cyrih të Zvicrës.
Po ashtu, gjykata aprovoi edhe propozimin e mbrojtësit të të akuzuarit Kreshnik Mehmetaj, avokatit Sylë Lokaj, që në cilësi të dëshmitarëve të dëgjohen Nue Mehmeti, Isa Dervishaj, Bekim Dodaj dhe Agim Dodaj, si dhe të bëhet administimi i provave: raporti i Spitalit të Përgjithshëm, dy fotografitë e automjetit, si dhe 12 fotografi që paraqesin bisedën telefonike.
Gjykata aprovoi edhe propozimin e mbrojtësit të të akuzuarit Halil Mehmetaj, avokatit Florent Latifaj, për dëgjimin e dëshmitarëve Besim Halilaj – hoxhë i fshatit, Shefqet Mehmetaj dhe Isa Mehmetaj
Por, u refuzua propozimi i avokatit Latifaj, për dëgjimimin e dëshmitarit Malsor Mehmetaj, me arsyetimin se ndaj tij është zhvilluar procedurë hetimore bashkë me të akuzuarit e tjerë pasi që i njëjti kishte qenë bashkë i pandehur për këtë rast.
Me këtë, seanca e sotme përfundoi.
Sipas aktakuzës së ngritur më 5 maj 2023 nga Prokuroria Themelore në Pejë, të pandehurit Halil, Kastriot dhe Kreshnik Mehmetaj, ngarkohen se më 26 nëntor 2021, në fshatin Gllogjan, Komuna e Deçanit, saktësisht në rrugën “Ismajl Haradinaj”, të shtyrë nga hakmarrja e paskrupullt, në marrëveshje e bashkëveprim me njëri-tjetrin, privojnë nga jeta tre persona, dy prej tyre të cilët ishin fëmijë. Pra, të vdekur mbetën shoferi i autobusit G.Gj, si dhe nxënësit L.H (17 vjeçar) dhe G.M (17 vjeçare)
