Kryeparlamentari Glauk Konjufca në konferencën pas takimit që pati me presidentin e Këshillit Kombëtar të Zvicrës, Eric Nussbaumer, tha se Serbia e pandëshkuar për sulmin në Banjskë “ka për ta përsëritur” skenarin e njëjtë, por këtë radhë ai paralajmëron se do ta bëjë në përmasa më të mëdha.
“Një temë e pashmangshme në këto rrethana të paqëndrueshmërisë globale në të cilat ndodhemi ishte edhe siguria në Kosovë dhe rreziqet me të cilat po përballemi për shkak të pretendimeve territoriale të Serbisë ndaj Kosovës. Ia shpreha shqetësimin tim presidentit Nussbaumer se po që se Serbia lihet e pandëshkuar lidhur me agresionin terrorist në Banjskë që u krye në shtator të vitit të kaluar, Serbia ka për ta përsëritur këtë skenar, por me përmasa shumë më të mëdha” ka thënë Konjufca.
“Si një nga shtetet që nuk e ka mbështetur sanksionimin e Rusisë përballë luftës pushtuese të Ukrainës dhe vazhdon të kultivojë bashkëpunim ushtarak me Rusinë, Serbia duhet të shihet jo vetëm rrezik në Kosovë, por për krejt stabilitetin dhe paqen në Ballkanin Perëndimor. Çdo sfidë që ne e kemi ne në Ballkanin Perëndimor rrjedh prej kësaj arsye”, ka shtuar ai.
Ai më pas falënderoi Zvicrën për rolin mbështetës që ka për Kosovën.
“Falënderoj Zvicrën për mbështetjen për Kosovën për ta forcuar sovranitetin shtetëror dhe sundimin e ligjit, si dhe në përcaktimin tonë për ta ndjekur pa asnjë dyshim rrugën e integrimit europian, duke përfshirë tash së fundi edhe përpjekjen tonë për anëtarësim në organizata ndërkombëtare, përfshirë KiE”.
Konjufca tha se për këtë të fundit, “Zvicra dha një mbështetje të parezervë”./Express
