Presidentja e Republikës së Kosovës, Vjosa Osmani, në kuadër të samitit të katërt të Komunitetit Politik Evropian (EPC), ka takuar Presidentin e Lituanisë, Gitanas Nausėda.
“Si demokraci në vijën e parë, shtetet tona ndajnë përkushtim të thellë për të qëndruar të bashkuar kundër regjimeve autokratike. Republika e Kosovës është thellësisht mirënjohëse për përkrahjen e Lituanisë”, ka thënë Presidentja Osmani
Presidentja Osmani, ka takuar edhe kryeministren e Estonisë, Kaja Kallas, në Samitin e Liderëve të EPC-së në Londër.
Osmani ka thënë se paqja dhe siguria në Evropë kërkojnë lidership të fortë dhe të guximshëm, të cilin kryeministrja Kallas e ka demonstruar në vazhdimësi.
“Gjithnjë kënaqësi të flas me Kryeministren e Estonisë, Kaja Kallas, në Samitin e Liderëve të EPC-së”, ka shkruar ajo në Facebook.
Samiti i katërt i Komunitetit Politik Evropian po mbahet në Londër me pjesëmarrjen e 47 vendeve evropiane, njëherësh takimi më i madh i liderëve evropianë në vitet e fundit.
