Trent Alexander-Arnold e ka quajtur Lionel Messin si lojtarin më të mirë që ka luajtur ndonjëherë futboll.
Ylli i Liverpool-it është aktualisht në një pushim të zgjatur veror pas zhgënjimit në finalen e Euro 2024 të Anglisë dhe do të kthehet në një datë të mëvonshme për stërvitjet para-sezonale
Megjithatë, ai ka dhënë mendimin e tij mbi një nga debatet më të mëdha të futbollit kur Alexander-Arnold u pyet për lojtarin më të mirë me të cilin ka luajtur ndonjëherë në një intervistë me The Mirror.
25-vjeçari ka luajtur kundër disa nga lojtarët më të mëdhenj të kohëve moderne gjatë karrierës së tij të mbushur me trofe në Anfield, përfshirë emra si Cristiano Ronaldo, Neymar dhe Kylian Mbappe, por ka rezervuar lëvdata të veçanta për Messin.
Alexander-Arnold ishte në qendër të dështimit të Messit në Ligën e Kampionëve me Barcelonën në vitin 2019, kur Liverpool-i realizoi një rikthim të mahnitshëm 4-0 për të eliminuar gjigantët katalanas nga kompeticioni.
Tani ai ka dhënë një pasqyrë se si është të luash kundër kapitenit fitues të Kupës së Botës me Argjentinën dhe e ka vendosur atë mbi Ronaldon si lojtari më i madh i futbollit.
“Për mua duhet të jetë Messi. Lojtari më i mirë që mendoj se ka luajtur ndonjëherë. Nuk kam parë Maradonën,” tha Alexander-Arnold.
“Të imagjinosh dikë më të mirë se çfarë kam qenë në gjendje të shoh, truri im nuk e kupton. Nuk ka asnjë mënyrë që dikush të jetë më i mirë se Messi.
“Thjesht ndjehet ndryshe të luash kundër tij se sa kundër cilitdo tjetër, gjithmonë je në alarm të kuq kur topi është pranë tij, është shumë e rrallë që një lojtar të të japë atë ndjenjë.
“Shumë, shumë aspekte të lojës ai është ndoshta më i miri,” shtoi ai.
Messi së fundmi shtoi një tjetër titull në kabinetin e tij të trofeve duke udhëhequr Argjentinën drejt një titulli të dytë radhazi të Copa America, por pësoi një dëmtim të rëndë në kyçin e këmbës gjatë finales.
