Kryeministri Edi Rama ndodhet në Paris, ku mori pjesë në Samitin e Sportit për Zhvillim, që u mbajt në prag të nisjes së Lojërave Olimpike “Paris 2024”.
Kryeministri Edi Rama i shoqëruar nga bashkëshortja Linda Rama, u pritën sot në një ceremoni zyrtare nga presidenti i Francës, Emanuel Macron dhe bashkëshortja Brigitte Macron.
Kreu i qeverisë ka ndarë në rrjetet sociale momente nga pritja që i është rezervuar në kryeqytetin e Francës. “Paris, pritja e presidentit të Francës, Emanuel Macron, për liderët e shteteve pjesëmarrëse në Lojërat Olimpike”, shkruan Rama.
Edicioni i 33-të i Lojërave Olimpike do të nisë sot, 26 korrik. Në “Paris 2024” Shqipëria merr pjesë për herë të dhjetë në olimpiadë. Ekipi kuqezi përbëhet nga tetë sportistë, katër nga të cilët e kanë siguruar kualifikimin me normë në bazë të perfomancës sportive dhe katër të tjerë janë me ftesë.
Atletja Luiza Gega si dhe tre mundësit Zelimkhan Abakarov, Islam Dudaev e Chermen Valiev janë sportistët e Shqipërisë që shkojnë “Paris 2024” si të kualifikuar me normë.
Ekipi shqiptar ka përfituar edhe katër ftesa për “Paris 2024”. Kështu me ftesë në Lojërat Olimpike “Paris 2024” do të konkurrojë Franko Burraj në atletikë, Greisi Koxhaku dhe Kaltra Meça në not, si dhe Manjola Konini në qitje sportive.
