Kryeministri Albin Kurti mori pjesë si mysafir nderi në drekën e ftuar nga ambasadori i BE-së në Kosovë, Tomáš Szunyog me ambasadorë të akredituar të vendeve të Bashkimit Europian dhe vendeve kandidate për Bashkim Europian në Kosovë, ka njoftuar Zyra e Kryeministrit.
Ky njoftim vjen pasi Kurti mungoi në takimin konsultativ të presidentes Osmani që mbajti në orën 14:00 me liderë të partive politike që janë të përfaqësuara në Kuvend
Ajo në konferencë tha se në takimin e sotëm s’ka qenë prezent kryetari i Lëvizjes Vetëvendosje, Albin Kurti, duke shtuar se nuk i di arsyet për mungesën e tij.
Ajo u ka thënë gazetarëve në pyetjen se pse Kurti s’ka shkuar në takim se mund të shkojnë ta pyesin në zyrën e tij, duke supozuar se Kurti ndodhet në zyrën e tij në Qeverinë e Kosovës.
“Mirënjohës për ftesën si mysafir nderi, kryeministri Kurti falënderoi të gjithë ambasadorët për bashkëpunimin dhe komunikimin e rregullt. Në veçanti falënderoi ambasadorin Szunyog, i cili është në përmbyllje të mandatit të tij si Shefi i Zyrës së BE-së në Kosovë, për kontributin e tij, përveçse bashkëpunimin e mirë. Në këtë drekë, kryeministri theksoi rëndësinë që ka Plani i Rritjes së BE-së për Ballkanin Perëndimor dhe për Kosovën, veçanërisht, dhe përgatitjet që Qeveria po bën për këtë plan. Ai bëri thirrje për largimin e masave të BE-së ndaj Kosovës, teksa përsëriti mbështetjen dhe orientimin e qartë që Kosova ka për anëtarësim në Bashkimin Evropian”, thuhet në njoftimin e ZKM-së.
