Ish-kryetari i Partisë Liberale dhe ish deputeti Ivon Veliçkovski ka komentuar incidentin që presidentja e Kosovës, Vjosa Osmani kishte në Aeroportin e Shkupit. Ai ka thënë se para fokusit në procedurën e sigurimit të kreut të Kuvendit, Afrim Gashit, duhet përgjigje se “A kalojnë të gjithë kryetarët/ministrat e jashtëm/kryetarët e Kuvendit dhe VIP-at e ngjashëm në skanerin në aeroportin e Shkupit gjatë vizitës apo tranzitit?”
Ai ka pyetur nëse do të veprohej njëjtë me Presidentin e Serbisë, Aleksander Vuciq.
“Me këtë logjikë, a do t’i thonë nesër Davkovës në kufi që ta hapë bagazhin që të vërtetojnë se nëse bartë ajvar gjatë vizitës në manastirin “Shën Prohor Pçinski”? Apo bastisja e Osmanit duhet t’i sigurojë nesër takim më të denjë me nikoqirin në territorin serb, Vuçiqin? Dhe në fund, mendojeni nëse në Petrovec ndonjë nëpunës do t’i kërkonte Vuçiqit që gjatë transitit të hapë bagazhin? Nuk dua të shpenzoj më shumë fjalë që nëse gjatë vizitës së Lavrovit, në kuadër të Samitit të OSBE-së në Shkup, ia kontrolluan bagazhin e dorës?”, ka shkruar, Veliçkovski.
Ai shtoi se” dëshira e kësaj qeverie për të problematizuar marrëdhëniet me fqinjët e saj (me përjashtim të Serbisë) është e qartë që në ditën e parë”.
“Prishja e marrëdhënieve me Kosovën, që është synimi kryesor me poshtërimin e presidentit të shtetit, përforcon pyetjen nga titulli “Kush është truri i përpjekjes për të poshtëruar Vjosa Osmanin?”, ka shkruar Veliçkovski.
Presidentja Vjosa Osmani është përfshirë në një incident me pjesëtarët e sigurimit në Aeroportin e Shkupit, prej ku planifikonte të udhëtonte për diku nëpërmjet Zonës VIP. Sipas Presidencës, Osmani u provokua dhe u tentua që t’i merrej telefoni dhe bagazhi për t’iu kontrolluar në skaner. Ministria e Brendshme e Maqedonisë së Veriut tha se bagazhi megjithatë u skanua. Aeroporti i Shkupit ka bërë një reagim, pa ia përmendur emrin Presidentes, duke thënë se e kanë obligim ta kontrollojnë secilin pasagjer. Nga MPJD e kanë quajtur këtë trajtim jo dinjitoz, derisa kanë thënë se po mbledhin informata nga Ambasada e Maqedonisë dhe Ministria e Punëve të Jashtme.
