Kandidati i PDK-së për kryeministër, Bedri Hamza, po e vazhdon vizitën e tij në Shtetet e Bashkuara të Amerikës. Ai sot ka njoftuar që në “Atlantic Council” ka takuar ambasadorin Daniel Fried dhe eksperten e lartë për NATO, Rachel Rizzo, me të cilët ka biseduar për situatën aktuale dhe hapat që duhet t’i marrë Kosova për të kthyer vendin në rrugën e anëtarësimit të shpejt në NATO.
“ Sapo përfundova një takim përmbajtjesor në Këshillin Atlantik, një nga organizatat më të rëndësishme në Washington, D.C. Pata nderin të bashkëbisedoj hollësisht me Ambasadorin Daniel Fried, i cili ishte Ndihmës Sekretar i Shtetit kur Kosova shpalli pavarësinë, si dhe me eksperten e lartë për NATO-n, Rachel Rizzo. Ne biseduam për situatën aktuale në Kosovë dhe për hapat që duhet të ndërmarrë Qeveria e ardhshme për ta kthyer vendin në rrugën e anëtarësimit të shpejtë në NATO” ka shkruar Hamza.
Ai tutje thotë se aleatët dhe mqtë e Kosovës janë të shumtë në SHBA dhe se objektivat që ka si kandidat për kryeministër, arrihen vetëm në bashkëpunim me miqtë e aleatët dhe jo nëse Kosova izolohet nga bota.
“Aleatët dhe miqtë e Kosovës janë të shumtë në kryeqytetin e Amerikës dhe të botës së lirë. Plani im për qytetarët e Kosovës është i qartë dhe i fokusuar në rritjen ekonomike, rritjen e pagave dhe përmirësimin e mirëqenies. Këto objektiva të përbashkëta mund të arrihen vetëm në bashkëpunim me miqtë e aleatët dhe jo nëse izolohemi nga bota”, ka shrkruar Hamza.
