Presidenti palestinez Mahmoud Abbas i ka thënë presidentit rus Vladimir Putin se ai qëndron me Moskën “pa më të voglin dyshim”. Kwto komente erdhën gjatë vizitës së tij në Rusi të martën (13 gusht) ku ai u takua me Putinin në Novo-Ogaryovo.
Zyrtarët thanë se të dy udhëheqësit diskutuan marrëdhëniet dypalëshe, situatën në Lindjen e Mesme dhe luftën në Gaza.
“Ne jemi të durueshëm, të palëkundur në tokën tonë dhe kërkojmë ndalimin e luftimeve, ofrimin e ndihmës humanitare për palestinezët dhe moszhvendosjen e tyre”, tha Abbas gjatë takimit.
Putin ripohoi mbështetjen e Rusisë për krijimin e një shteti palestinez dhe theksoi se qëndrimi i Rusisë për nevojën për një zgjidhje paqësore me Izraelin mbet i pandryshuar.
Putin tha se Moska po i kushtonte vëmendje ngjarjeve në Lindjen e Mesme pavarësisht nga kërkesat e luftës së saj në Ukrainë. Ai nuk iu referua drejtpërdrejt inkursionit njëjavor të Ukrainës në Rusinë perëndimore, një operacion që ka kapur ushtrinë ruse në befasi dhe ka detyruar më shumë se 130,000 njerëz të largohen nga shtëpitë e tyre.
“Të gjithë e dinë mirë se Rusia sot, për fat të keq, duhet të mbrojë interesat e saj dhe të mbrojë popullin e saj me armë në dorë. Por ajo që po ndodh në Lindjen e Mesme, ajo që po ndodh në Palestinë, natyrisht, nuk kalon pa u vënë re nga ana jonë”, tha Putin, sipas një transkripti të Kremlinit.
“Dhe sigurisht, ne po shikojmë me dhimbje dhe ankth të madh katastrofën humanitare që është shpalosur në Palestinë”, shtoi ai.
Abbas i tha Putinit gjatë takimit të tyre se Rusia ishte “një nga miqtë më të dashur” të popullit palestinez. “Ne besojmë në ju, ju besojmë dhe ndjejmë mbështetjen tuaj,” tha ai./Euronews dhe The Times of Israel
