Një stërvitje shumëkombëshe ushtarake me titullin “Ura është shumë larg” u organizua nga Forcat Mbrojtëse Hungareze KFOR, në fund të korrikut, duke përfshirë rreth pesëqind ushtarë.
Ky aktivitet synonte përgatitjen për sfidat e sigurisë në Kosovë dhe integrimin e batalionit manovrues rumun në KFOR, raporton honvedelem.hu,
Stërvitja, e përshkruar si tepër komplekse dhe realiste, u zhvillua në dy lokacione dhe kishte për qëllim forcimin e aftësive për të siguruar lirinë e lëvizjes dhe një ambient të sigurt operacional në Kosovë.
Një aspekt i rëndësishëm i stërvitjes ishte integrimi i batalionit rumun në KFOR, që përbënte një hap të rëndësishëm pas bashkimit të këtij batalioni në korrik.
Gjatë stërvitjes, personeli ushtarak demonstroi aftësitë e tyre luftarake në skenarë të drejtpërdrejtë, përfshirë misione komplekse sigurie në afërsi dhe operacione për kontrollin e turmave. Përfshirja e agjencive si EULEX dhe Njësia Speciale Multinacionale (MSU) shtoi shkallën dhe diversitetin e ushtrimit, duke theksuar rëndësinë e bashkëpunimit ndërkombëtar për sigurinë e Kosovës.
Komandanti i Kontingjentit Hungarez të KFOR-it, Nënkolonel Dávid Szent-Imrey, shprehu kënaqësinë për këtë përpjekje të përbashkët, duke thënë: “Njëzet e pesë vjet bashkëpunim midis Batalionit Paqeruajtës Hungarez dhe Rumun kanë kulmuar me pjesëmarrjen tonë të përbashkët në këtë operacion paqeruajtës”.
Ushtrimi u vlerësua si i suksesshëm, duke përmbushur objektivat e tij kryesore, përfshirë përgatitjen për sfidat e sigurisë në Kosovë dhe integrimin e suksesshëm të batalionit rumun në KFOR
