Një konflikt i çastit mes dy 15-vjeçarëve mbrëmjen e së premtes përfundoi me përdorimin e thikave, duke lënë të plagosur njërin prej tyre.
Policia ka bërë të ditur se ka shoqëruar në komisariat autorin e dyshuar të ngjarjes, si dhe një 14-vjeçar, i cili është përfshirë në konflikt.
“Në vijim të informacionit paraprak të dhënë për plagosjen me mjet prerës të një 15 vjeçari gjatë një konflikti, të ndodhur në qytetin e Kukësit, ju informojmë se:
Falë veprimeve të shpejta, shërbimet e Policisë Kukës, identifikuan dhe shoqëruan në Komisariat për veprime të mëtejshme, një 15 vjeçar që dyshohet si autor, si dhe një 14 vjeçar që është përfshirë në konflikt mes dy 15-vjeçarëve.
Shërbimet e Policisë gjetën dhe sekuestruan në cilësinë e provës materiale mjetin prerës (thikë) që dyshohet se është përdorur gjatë konfliktit, ku mbeti i plagosur 15-vjeçari.
Veprimet hetimore po kryhen në praninë e psikologut, Prokurorit dhe familjarëve të të miturve”, njofton policia.
