Katër të dënuar janë arratisur nga një spital në Bavari në Gjermani, ku trajtohen të burgosurit me probleme psikologjike ose varësi.
RTL raporton se ata u arratisën mbrëmjen e së shtunës pak pas orës 21:00. Katër pacientët e spitalit psikiatril BKH Lerchenhaid dyshohen se e kishin kërcënuar fillimisht një punonjës, duke u larguar më pas drejt Alburgut.
Policia lëshoi një deklaratë me përshkrime të hollësishme për secilin prej të arratisurve, përfshirë fotografitë, si dhe informacione rreth veshjeve me të cilat janë parë për herë të fundit.
Zeqir Beqiri, 27 vjeç, nga Kosova, është njëri nga të arratisurit
Nga policia gjermane ai përshkruhet si kështu: “27 vjeç, përafërsisht 70 kg, përafërsisht 185 cm, shtat normal, flokë të gjatë bionde/kafe të lidhura bisht, mjekër të plotë”.
Sipas gjetjeve të deritanishme, Policia thotë se ai kishte veshur një bluzë të zezë dhe pantallona të zeza gjatë arratisjes.
Mediat gjermane shkruajnë për shqetësimin në rritje në qytetin e Straubing, që ka një popullsi prej 50,000 banorësh, pas arratisjes së të burgosurve.
Bashkë me kosovarin, janë arratisur edhe një 31-vjeçar boshnjak dhe dy 28-vjeçarë gjermanë.
