Presidentja Vjosa Osmani ka kujtuar sot Shën Terezen, në ditën që shënon 27 vjetorin e kalimit të saj në amshim dhe dita e Shenjtërimit të saj që kishte ndodhur me 5 shtator 2016 nga Selia e Shenjtë në Vatikan.
Në postimin e saj në facebook, Presidentja ka filluar me evokimin e deklaratës historike të Nënës Tereze ku thoshte se “Me gjak jam shqiptare” për të vazhduar tutje duke sjellur virtytet e saja të paçmuara në kujdesin ndaj njerëzimit.
Postimi i plotë:
“Me gjak unë jam shqiptare. Me shtetësi jam indiane. Me besim unë jam një murgeshë katolike. Sipas profesionit tim, unë i përkas botës…” – Shën Tereza.
Në Ditën e Humanizmit, nderojmë jo vetëm jetën dhe trashëgiminë e një gruaje të jashtëzakonshme, por edhe vlerat që ajo mishëroi – dhembshurinë, dashurinë dhe shërbimin ndaj njerëzimit.
Nënë jonë Terezë mbetet një fanarë dhembshurie, përulësie dhe shërbimi vetëmohues ndaj njerëzimit. Anjezë Gonxhe Bojaxhiu, me krenari e identifikoi veten si shqiptare, ndaj vepra e saj jetësore gjithnjë na mbushë zemrat me krenari e frymëzim.
Përkushtimi i Nënë Terezës për më të varfrit, besimi i saj i palëkundur dhe dashuria për njerëzit, pavarësisht nga prejardhja e tyre, duhet të jenë udhërrëfyes për një botë më humane.
Në 27 vjetorin e ikjes në amshim e kujtojmë me respekt dhe jemi krenar që botës i dhamë nënën më të madhe që njohu njerëzimi, Gonxhe Bojaxhiun, të Shenjtën Terezë.
