Nisja e tij ishte shtyrë disa herë. Por sot (e martë), pavarësisht një vonese prej dy orësh për shkak të motit të keq: misioni Polaris Dawn u ngrit nga Qendra Hapësinore Kennedy në Florida, me të cilën SpaceX e Elon Musk do të nisë shëtitjen e parë private në hapësirë.
Në orën 5.23 të mëngjesit u bë lëshimi i raketës Falcon 9.
Në bordin e anijes Crew Dragon janë miliarderi Jared Isaacman, financuesi i programit Polaris, në rolin e komandantit, së bashku me pilotin Scott Poteet dhe te specialistet e misionit Sarah Gillis dhe Anna Menon.
Misioni, i cili pritet të zgjasë pesë ditë, do t’i çojë katër astronautët 1400 kilometra larg Tokës.
Që nga misionet e fundit Apollo, në fillim të viteve 1970, njerëzit nuk kanë arritur një distancë të tillë nga planeti. Për krahasim: Stacioni Ndërkombëtar Hapësinor orbiton në rreth 400 kilometra mbi nivelin e detit.
Me vështrimin e kthyer nga Marsi
Një shëtitje në hapësirë është planifikuar 700 kilometra larg Tokës, e cila synon të testojë një kostum të ri të krijuar për misionet e ardhshme në Hënë dhe Mars.
Gjithashtu do të testohet një teknologji komunikimi e bazuar në lazer për programin e internetit satelitor Starlink.
Musk synon që në vitin 2026 të dërgojë një anije kozmike pa pilot në Mars, me synimin për të testuar besueshmërinë e uljeve në planet.
“Nëse gjithçka shkon mirë, fluturimet e para me njerëz në Mars do të ndodhin pas katër vjetësh”, shkroi ai në Platformën X./Informim.net/
