Ministri i Brendshëm serb Ivica Daçiq njoftoi se do të nisin patrullat e përbashkëta policore nga Serbia dhe Kina.
Sipas tij patrullimet forcojnë miqësinë mes dy vendeve.
Daçiq, i cili po viziton Kinën sot, pas pjesëmarrjes në Forumin Global për Bashkëpunimin në Fushën e Sigurisë Publike në Lianjungang, udhëtoi për në Guangzhou, ku do të takohet me përfaqësuesit më të lartë të sigurisë të provincës Guangdong dhe qytetit të Guangzhou, njoftoi Ministria të Punëve të Brendshme të Serbisë.
Daçiq të mërkurën do të marrë pjesë në stërvitjen përfundimtare të njësive speciale të MPB-së së Serbisë dhe Ministrisë së Sigurisë Publike të Kinës dhe do të vizitojë pjesëtarët e policisë serbe që marrin pjesë në patrullimet e përbashkëta me kolegët e tyre kinezë.
“U befasova kur duke lexuar gazetën kineze China Daily, hasa në një foto të policëve tanë në një patrullë të përbashkët me kolegët e tyre kinezë, të cilët shkova për t’i vizituar. Më vjen mirë që edhe miqtë tanë kinezë i kushtojnë rëndësi dhe e vënë në pah rëndësinë. të patrullave të përbashkëta, dhe t’i promovojë me faktin se në këtë gazetë të njohur, në një vend të rëndësishëm është publikuar lajmi me këtë foto, i cili ka dërguar në botë fotografinë më të mirë të policit serb”, ka thënë Daçiq, i cili është edhe Zëvendëskryeministri i Serbisë.
Para dy vitesh u raportua se Kina ka ngritur më shumë se 100 stacione të ashtuquajtura policie jashtë shtetit në të gjithë globin për të monitoruar, ngacmuar dhe në disa raste riatdhesuar shtetasit kinezë që jetojnë në mërgim, shkruan CNN.
Kina raportohet se ka përdorur marrëveshje dypalëshe të sigurisë të arritura me shtete në Evropë dhe Afri për të fituar prani ndërkombëtare.
Në mesin e vendeve ku ka stacione janë edhe Kroacia, Serbia, Rumania.
Zyrtarët policorë kinezë janë parë duke patrulluar rrugët e Zagrebit në korrik të këtij viti.
Një zyrtar policor kroat kishte thënë për agjencinë “Xinhua” se patrullimet ishin për “mbrojtje dhe tërheqje të turistëve të huaj”.
E në një raport të vitit 2019 nga agjencia Reuters thuhet se zyrtarët policorë kinezë i janë bashkuar atyre serbë për të patrulluar në Beograd “e ndihmuar në adresimin e fluksit të turistëve kinezë”.
