Nën dyshimin për mashtrim, sot është arrestuar Gjylfidane Morina e cila është mësuese në shkollën Xhemal kada në Pejë. Këtë e ka konfirmuar zëdhënësi i prokurorisë në Pejë, Shkodran Nikqi.
“Prokurori i shtetit ka urdhëruar ndalimin 48 orë për të dyshuarin, – mësimdhënëse”, ka thënë ai.
Mirret vesh se e dyshuara ka mashtruar dhjetra persona, në lidhje me dokumentet për aplikim për subvencione për bujqësi. Sipas burimeve mediatike bëhet e ditur se ajo ka pasur mbi 300 mijë euro qarkullim në xhirollogarinë e saj bankare.
Kujtojmë se lidhur me këtë incident, në vitin 2022 kishte pasur reagime të shumta.
Mësimdhënësja e arrestuar në Pejë ishte e përfshirë në incidentin ku fëmijët e komuniteteve pakicë u ndanë nga Festa e Abetares
Në maj të vitit 2022, jo të gjithë nxënësit e festuan njëjtë festën e abetares në Karagaq të Pejës. Në vend se të ishin pranë shokëve të tyre për të kremtuar, 10 nxënës të komunitetit RAE ishin ndarë duke u ulur në ulëset e tifozëve. Mësuesja që i kishte ndarë fëmijët e komuniteteve pakicë ishte po Gjylfidane Morina.
Ish deputeti, Veton Berisha kishte publikuar një kronike nga Festa e Abetares në Pejë, ku shihej se një grup nxënësish të komunitetit Rom, Ashkalinj, Egjiptianë, ishin veçuar nga ceremonia e përfundimit të klasës së parë dhe shokët e klasës.
“Një mësuese e shkollës fillore “Xhemajl Kada” në Pejë e quajtur Gjylfidane Morina duke iu bërë nder fëmijëve të këtyre komuniteteve i vendos në një vend krejt të veçantë prej nxënësve Shqiptarë dhe larg nga aktiviteti që po zhvillohej, me arsyetimin se këtë po e dëshirojnë fëmijët ndërsa fëmijët e konfirmonin të kundërtën”, kishte shkruar Berisha.
Poashtu, Ministrja Nagavci ishte shprehur e shqetësuar duke thënë se këtë problem do ta trajtojë me prioritet.
“Si ministre e MASHTi shpreh shqetësimin e thellë për rastin e raportuar në medie si diskriminues për pjesëmarrjen e nxënësve nga komunitetet, rom, ashkalinj dhe egjiptas në aktivitetin e sotëm të Festës së Abetares në Pejë!”, kishte shkruar ajo në Facebook.
Sipas saj, “parimi i mosdiskriminimit është pjesë e politikave dhe veprimeve tona në vazhdimësi, prandaj duhet respektuar dhe zbatuar në të gjitha nivelet”.
Lidhur me rastin pati reaguar edhe ministri i Administrimit të Pushtetit Lokal (MAPL), Elbert Krasniqi. Krasniqi ka dënuar ashpër këtë gjest dhe ka kërkuar nga institucionet që të thirren në përgjegjësi personat përgjegjës.
