Pas përfundimit të renovimit së Shkollës Mesme të Lartë “Ahmet Gashi” në Prishtinë, sot u mbajt ceremonia e hapjes së saj. Me këtë rast ministrja e Arsimit, Shkencës, Teknologjisë dhe Inovacionit, Arbërie Nagavci, theksoi se Qeveria e Republikës së Kosovës e ka në fokus infrastrukturën shkollore si pjesë me rëndësi për krijimin e kushteve për përmirësimin e cilësisë së arsimit.
E para arsimit tha se kjo shkollë e mban emrin e arsimtarit, gjeografit e historianit të shquar, Ahmet Gashi
Ministrja theksoi se Ahmet Gashi kishte kontribut të veçantë e të jashtëzakonshëm në vitet 1990, atëherë kur jepte mësim fshehurazi sepse jetonim në kohë tjera në ditë të vështira dhe veprimtaria dhe puna e tij si mësimdhënës bëhej me një rrezik të madh. E sot që gjuhën shqipe e mësojmë në liri e kur mësimi zhvillohet në gjuhën shqipe, tha Nagavci, i kemi edhe kushtet fizike për të mundësuar se përvetësimi i dijeve të jetë sa më cilësor.
“Ky gjimnaz i cili me dekada përgatit të reja dhe të rinj në drejtime shoqërore, duke iu dhënë atyre një bazë të fortë me të cilën formohen për t’u bërë individ të shëndosh që i duhen shoqërisë sonë “, tha ajo.
“Përmrësimi i cilësisë së arsimit në të gjitha nivelet e arsimit është objektvi parësor në strategjinë tonë të arsimit”, shtoi ajo.
Ndërkaq, ambasadori amerikan, Jeffrey Hovenier u shpreh krenar që qeveria amerikane ka dhënë kontributin e saj në renovimin e plotë të këtij objekti shkollor.
“Shkolla ‘Ahmet Gashi’ ka pasur nevojë për ndryshime dhe përmirësime rrënjësore për të siguruar nxënësve mjedis më të mirë dhe mësim me kushte më të mira. Tash kjo shkollë do t’u ofrojë shumë kushte të mira për mësim. Prioriteti i ambasadës së SHBA-së në Kosovë është mbështetja e zhvillimit të të rinjve në Kosovë, prandaj suksesi i nxënësve, suksesi i juaj është më të vertetë jetik për të ardhmen e Kosovës si dhe për rolin e saj për t’i kontribuar komunitetit mbarëbotëror. Ky donacion jo vetëm që përmirëson infrastrukturën e një shkolle por simbolizon edhe partneritetin në mes te SHBA-së dhe shtetit të Kosovës”, tha Hovenier
Kryetari i Prishtinës, Përparim Rama tha se ky renovim i mundësuar me mbështetjen bujare të ambasadës amerikane është dëshmi e fuqisë së partneritetit dhe të besimit të përbashkët në rolin transformues të arsimit, i cili është themeli që e ndërtojmë jo vetëm të ardhmen e qytetit tonë por edhe të vendit.
“Fëmijët tanë këtu janë drejtuesit dhe formësuesit e së nesërmes kështu që detyra jonë është që t’ua ofrojmë mjedisin e përshtatshëm për të mësuar dhe për t’u zhvilluar, prandaj kontributi i ambasadës amerikane për renovimin e plotë të shkollës dhe dhurimi i këtyre pajisjeve të reja mësimore sigurojnë së nxënësit tanë do të kenë kushtet e duhura për të përparuar në botën moderne”, tha Rama
