Është zbuluar arsyeja pse lojtarët e Manchester Cityt dhe Interit do të mbajnë shiritin e zi gjatë ndeshjes së tyre në Champions League.
Liga e Kampionëve 2024/25 filloi të martën mbrëma, me disa nga skuadrat më të mira të Evropës që luajtën të gjitha ndeshjet e tyre të para të formatit të ri.
12 skuadra të tjera do të luajnë ndeshjen e tyre hapëse sonte, duke përfshirë kampionin e Premierligës, Manchester City që pret gjigantin italian Inter Milan në stadiumin Etihad.
Gjatë ndeshjes, lojtarët e të dyja palëve do të mbajnë shirita të zinj dhe është bërë e ditur arsyeja për këtë.
Dy skuadrat do të mbajnë shirita të zinj gjatë ndeshjes për të nderuar legjendën italiane Salvatore Schillaci, i cili u nda nga jeta më herët gjatë ditës së sotme.
Schillaci, i njohur më mirë si ‘Toto’, vdiq në moshën 59-vjeçare pas një beteje dyvjeçare me kancerin e zorrës së trashë.
Sulmuesi e kaloi pjesën më të madhe të karrierës së tij me Juventusin, duke bërë 132 paraqitje për skuadrën italiane.
Ai gjithashtu kaloi dy vjet në Inter Milan, duke shënuar 12 gola në 36 paraqitje.
Megjithatë, ishte Kupa e Botës 1990 ku Toto e nguliti emrin e tij në legjendën e futbollit italian, pasi shënoi gjashtë gola për të fituar Këpucën e Artë në tokën vendase.
Edhe pse Italia u eliminua në gjysmëfinale të turneut, Schillaci u nderua edhe me Topin e Artë dhe në total, ai bëri 16 paraqitje për vendin e tij.
Duke reaguar ndaj lajmit tragjik, kryeministrja italiane Giorgia Meloni tha: “Po na lë një ikonë futbolli, një njeri që ka hyrë në zemrat e italianëve dhe sportdashësve në mbarë botën.
“Sulmuesi i netëve magjike të Italisë ’90 me kombëtaren tonë. Faleminderit për emocionet që na dhatë, që na bëtë të ëndërrojmë, të festojmë, të përqafojmë dhe të valëvitim flamurin tonë kombëtar.”
