Analisti Arjan Curri dhe kryetari i AKR-së, Behgjet Pacolli, do të përballen në gjykatë pas padisë për shpifje dhe fyerje të ngritur nga Pacolli. Seanca gjyqësore është caktuar të mbahet më 10 tetor në Gjykatën e Shkallës së Parë të Tiranës.
Pacolli ka ngritur padinë pas deklaratave që Curri bëri lidhur me vrasjen e Liridona Ademajt nga bashkëshorti i saj Naim Muresli. Curri deklaroi se Murseli, ish-këshilltari i Pacollit, dyshohej për një lidhje romantike me një burrë tjetër, duke lënë të kuptohej se mund të bëhej fjalë për Pacollin.
Në reagimin e tij, Curri mohoi çdo shpifje apo fyerje dhe theksoi se deklaratat e tij kanë qenë thjesht opinione. Ai gjithashtu shtoi se në vend që të përqendrohet në zbardhjen e motiveve të vrasjes së Ademajt, Pacolli po investon në gjyqe kundër gazetarëve dhe fjalës së lirë.
Curri, në një reagim për Top Channel, ka thënë se nuk kishte kryer shpifje dhe se pretendimet e Pacollit për dënimin e tij me burg ishin të pabaza. Ai vazhdoi duke ironizuar Pacollin dhe duke kritikuar mënyrën se si ai po trajton këtë çështje në vend të fokusimit në drejtësinë për viktimat.
“Si ndërtues dhe biznesmen i Kremlinit, Bexhet viktima mendon se në Shqipëri, ashtu si në Rusi, gazetarët burgosen për opinionet e tyre. Në deklaratat e mia s’ka patur kurrë shpifje as fyerje për askënd. Nëse Bexhet viktima flet një shqipe tjetër nga e imja, ky s’është problemi im. Po vjen nëntori i vitit të vrasjes se Liridona Ademit dhe Pacoll viktima, në vend që të interesohet për zbardhjen e motiveve të vrasjes së nënës së fëmijëve që ky u ka prerë flokët si kumbar, investohet në gjyqe kundër gazetarëve dhe fjalës së lirë në media”, ka thënë Curri.
“P.S: Termi “viktimë” për Bexhetin nuk është fyerje, por term gjyqësor, sepse në padinë kundër meje Pacolli merr statusin e viktimës akuzuese’, ka shtuar analisti Curri.
Në janar të këtij viti, këshilltari i Pacollit, Jetlir Zyberaj, paralajmëroi padinë ndaj Currit, duke e akuzuar për shpifje dhe duke sugjeruar se analisti ishte paguar për deklaratat e tij. Po ashtu, ndaj kësaj deklarate kishin reaguar edhe nga familja e biznesmenit Pacolli
