Gjatë qëndrimit në Bruksel, pas drekës së ftuar dhe organizuar nga Presidentja e Komisionit Evropian, Ursula von der Leyen, Kryeministri i Kosovës, Albin Kurti, ishte në Qendrën Evropiane për Politika (EPC), ku me titull “Kosova dhe BE-ja: Dinamikat dhe perspektiva aktuale”, u diskutua mbi rrugëtimin evropian të Kosovës.
Siç ka njoftuar zyra e kryeministrit, gjatë fjalës së tij hyrëse, “Kryeministri Kurti veçoi rritjen ekonomike të vendit, luftimin e krimit të organizuar dhe korrupsionit, sundimin e ligjit dhe zbatimi i reformave efektive në sistemin e drejtësisë, masat e punësimit, reformat ekonomike, mbështetjen e rritur për bujqësi, politika sociale dhe energjetike dhe digjitalizimin e shërbimeve, si disa prej arritjeve të qeverisjes. Shtoi se progresi ynë demokratik u dëshmua dhe nga rankimet e matjet e ndryshme ndërkombëtare”.
Tutje, në komunikatën e ZKM-së thuhet se “Integrimi evropian mbetet objektiv i yni parësor, nënvizoi kryeministri duke shprehur se zhvillimi që po njeh vendi shërben edhe në funksion të avancimit të rrugëtimit tonë drejt familjes evropiane”.
“Ai tha se Kosova ka arritur nivelin e zbatimit të Agjendës për Reformat Evropiane (ERA II) në mbi 70%, e gjithashtu Programi Kombëtar për Integrimin Evropian, i fokusuar në zbatimin e Marrëveshjes së Stabilizim-Asociimit (MSA), ka pasur një normë vjetore zbatimi që i kalon 60%. Në tre vitet e fundit, ne kemi adresuar e zbatuar me sukses reforma të shumta të vonuara prej kohësh, të cilat ishin rekomandime të kahershme e në mënyrë të përsëritur nga BE-ja që nga viti 2012. Kryeministri theksoi rëndësinë e iniciativës së BE-së për Planin e Rritjes, e për të cilën Kosova është përkushtuar maksimalisht duke qenë ndër vendet e para e cila ka dorëzuar dhe Agjendën e Reformave”, thuhet në komunikatë.
“Ai gjithashtu u shpreh se vendi ynë në vazhdimësi ka dëshmuar përkushtimin ndaj vlerave evropiane dhe demokratike dhe përafrimin me politikën e jashtme të BE-së, andaj ka ardhur koha që edhe BE-ja të bëjë hapa konkretë dhe marrë vendime të rëndësishme në lidhje me rrugën evropiane të Kosovës. Të tilla janë njohja nga ana e pesë shteteve mosnjohëse të Bashkimit Evropian dhe marrja e statusit të vendit kandidat dhe pyetësorin për anëtarësim. Pas fjalës hyrëse, kryeministri Kurti iu bashkëngjit diskutimit me të pranishmit, nën moderimin e analistes së politikave në EPC, Berta Lopez Domenech”, mbaron komunikata.
