Historike! Gentjan Shaqiri shpallet kampion i Europës në garat me makina. Profesori i Universitetit të Tiranës bëhet piloti i parë shqiptar që realizon një arritje kaq të madhe.
Ai fitoi titullin kontinental në një nga garat e FIA-CEZ, për Zonën e Europës Qendrore në kategorinë Hill Climb.
Kampioni kuqezi e mbylli sezonin në vendin e parë të D/E2 SS, duke regjistruar një sukses të paprecedent.
Shaqiri u pozicionua i dyti në garën e fundit sezonale në Austri, në Sant Agatha, rezultat që i mjaftoi të festonte një titull historik për atë personalisht dhe mbi të gjitha për sportet motorike shqiptare. Me njëvendëshen Tatuus FR 2000, me ngjyrë të kuqe dhe shqiponjën dykrenore, ai u rendit pas austriakut Christian Ferstl.
Pas titullit nënkampion në kategorisë D/E2 SS në Hill Climb të vitit të kaluar, piloti rriti stekën duke deklaruar se synonte të sillte në Shqipëri një titull historik. Misioni u realizua me sukses dhe tashmë kemi një kampion Europe në garat me makina, edhe pse kjo disiplinë është ende në fillimet e saj në Shqipëri.
