Pas ngjarjes tragjike në Liqenin e Badocit, ku tri persona humbën jetën, kryeministri i Kosovës, Albin Kurti, shprehu ngushëllime për familjarët dhe bëri thirrje për kujdes në trafik, duke theksuar rëndësinë e respektimit të kufizimeve të shpejtësisë.
Megjithatë, kjo thirrje u kritikua nga Besnik Tahiri, shefi i Grupit Parlamentar të AAK-së
Tahiri shprehu mendimin se qeveria dhe ministrat përgjegjës nuk duhet të reagojnë vetëm pasi ndodhin fatkeqësi tragjike. Ai nënvizoi se fokusi nuk duhet të jetë vetëm në masat ndëshkuese, por në investime më të gjera në teknologji moderne që mund të ndihmojnë në parandalimin e aksidenteve dhe përmirësimin e sigurisë rrugore.
Sipas Tahirit, disa nga hapat që duhet të ndërmerren për të përmirësuar sigurinë rrugore përfshijnë:
-Vendosjen e kamerave inteligjente që monitorojnë shpejtësinë
-Instalimin e tabelave me mesazhe të ndryshueshme që informojnë drejtuesit për rreziqet dhe kufijtë e shpejtësisë.
-Përdorimin e sistemeve që rregullojnë semaforët bazuar në rrjedhën e trafikut.
-Vendosjen e radarëve dhe tabelave që tregojnë shpejtësinë në kohë reale.
-Montimin e kamerave në semaforë për të monitoruar dhe kapur shkelësit që kalojnë në të kuqe.
Ai kritikoi qeverinë për mungesën e investimeve në këto teknologji, duke theksuar se këto masa do të ishin më efektive për të ruajtur jetën e qytetarëve dhe për të ulur numrin e aksidenteve fatale
