Dhjetra u raportuan të vrarë në sulmet izraelite në Gaza ndërsa luftimet intensifikohen në Liban Izraeli ka rritur ofensivën e tij tokësore në Gaza ndërsa zgjeron pushtimin e tij përtej kufirit në Liban.
Rreth 30 persona janë vrarë në një seri sulmesh në Gazën veriore gjatë natës, thanë zyrtarët lokalë, ndërsa janë rritur dënimet nga bashkësia ndërkombëtare për ofensivën e Izraelit ndaj Libanit fqinj.
Sipas agjencisë së mbrojtjes civile të Gazës, e drejtuar nga Hamasi, sulmet në qytetin e Jabalia lanë 12 të vdekur, ndërsa një breshëri e mëparshme që goditi disa shkolla dhe një kamp refugjatësh aty pranë vrau 18, ku mbeten mbi njëqind të plagosur dhe të tjerë të bllokuar nën rrënoja. Pamjet nga vendi i ngjarjes tregojnë një numër të madh fëmijësh mes viktimave.
Forcat izraelite të mbrojtjes nuk iu përgjigjën menjëherë një kërkese nga POLITICO për të komentuar incidentet, por kanë pohuar publikisht se kanë vrarë dhjetëra luftëtarë të Hamasit në sulme, por pa paraqitur prova.
Përveç vdekjeve nga sulmet me predha, numri i vdekjeve po rritet pasi Programi Botëror i Ushqimit paralajmëron se asnjë kamion ushqimor nuk është lejuar nga autoritetet izraelite të hyjë në Gaza që nga fillimi i tetorit dhe se rreth një milion njerëz janë në rrezik nga uria. Një raport i OKB-së të shtunën akuzoi gjithashtu Izraelin për sulme ndaj objekteve mjekësore në Gaza që “përbëjnë krime lufte të vrasjes dhe keqtrajtimit të qëllimshëm dhe krimin kundër njerëzimit të shfarosjes”.
Sipas Komitetit për Mbrojtjen e Gazetarëve, edhe raportimet në terren janë penguar nga qasja e kufizuar për gazetarët dhe vrasja e rreth 128 punonjësve të medias. Reporterët pa Kufij akuzojnë Izraelin se synon qëllimisht shtypin dhe organizon një “errësirë mediatike”.
Në të njëjtën kohë, në anën tjetër militantët e Hezbollahut në Libanin e afërt pretenduan sot (e shtunë) në mëngjes se kishin lëshuar një raketë në një strukturë ushtarake izraelite në jug të vendit, si dhe granatuan ushtarët e vendosur afër kufirit të përbashkët. Autoritetet izraelite thonë gjithashtu se dy drone kaluan nga Libani ku njëri goditi një ndërtesë në një periferi të Tel Avivit – nuk u raportua për viktima.
Izraeli po vihet nën presion në rritje për inkursionin e tij në Liban – për të cilin thotë se ka për qëllim zhdukjen e Hezbollahut, por që tashmë ka zhvendosur afër një milion njerëz, sipas vëzhguesve të OKB-së.
Franca dhe Italia thirrën të premten ambasadorët e Izraelit pasi paqeruajtësit e OKB-së u shënjestruan “qëllimisht” në një sulm që la katër persona të plagosur dhe u cilësua nga Parisi si “shkelje e rëndë e ligjit ndërkombëtar”.
Të shtunën, Nikaragua njoftoi se do të ndërpresë lidhjet diplomatike me Izraelin si shkak i përshkallëzimit të konfliktit, duke iu bashkuar një liste në rritje të vendeve, duke përfshirë Turqinë, Brazilin dhe Afrikën e Jugut, të cilat kanë tërhequr ambasadorët e tyre që nga fillimi i ofensivës në Gaza pak më shumë se një vit më parë.
Fushata ushtarake izraelite pasoi sulmet e 7 tetorit nga Hamasi ku u vranë më shumë se 1200 izraelitë./Politico
