S’ka kuorum për votimin e rezolutës së opozitës, ndërpritet seanca e jashtëzakonshme për ushqimin në FSK
Një seancë e jashtëzakonshme e Kuvendit që nisi në drekë për të diskutuar çështjen e furnizimit me ushqim të ushtarëve të Forcës së Sigurisë së Kosovës, u ndërpre në mungesë kuorumi të nevojshëm.
Deputeti i AAK-së, Bekë Berisha, në emër të deputetëve nënshkrues për thirrjen e kësaj seance, e lexoi në fund një rezolutë e cila mbeti pa u votuar. Ajo kërkonte zgjidhjen me urgjencë të furnizimit të ushtarëve me ushqim, dorëheqje në Ministrinë e Mbrojtjes dhe veprime nga Prokuroria e Shtetit.
“Kuvendi i Republikës së Kosovës kërkon nga Qeveria, Ministria e Mbrojtjes që me urgjencë ta zgjidhë çështjen e furnizimit me ushqim si dhe me të gjitha pajisjet tjera të nevojshme. Zyrtarët përgjegjës në Ministrinë e Mbrojtjes duhet të japin dorëheqje. Ministri i FSK-së, zëvendësministri, sekretari i përgjithshëm dhe e gjithë hierarkia përgjegjëse në administratën e Ministrisë. Kërkohet nga Prokuroria e Shtetit që të hapet procedurë ligjore për të hetuar rastin, duke përfshirë edhe dyshimet për FSK-në për çështje që kanë të bëjnë me interesa korruptive”, thuhej në rezolutë.
Nënkryetari i Kuvendit, Enver Hoxhaj, i mbylli punimet e seancës së jashtëzakonshme, për vazhdimin e së cilës tha se do të vendoset në Kryesi.
“Meqë nuk ka kuorum dhe nuk ka të tjerë të paraqitur për fjalë, unë i ndërpres punimet e kësaj seance dhe për vazhdimin e saj ju informojmë si Kryesi e Kuvendit”, tha ai.
Deputetët e PDK-së, LDK-së e AAK-së e akuzuan Qeverinë për korrupsion në Ministrinë e Mbrojtjes, ndërsa e konsideruan shqetësuese situatën në FSK.
Ministri i Mbrojtjes tha të dielën se po synojnë t’i “minimizojnë ndikimet negative” në furnizimin dhe shërbimin e ushqimit për personelin e FSK-së.
Ejup Maqedonci publikoi një “sqarim” në Facebook pas një letre që komandanti i FSK-së, Bashkim Jashari e dërgoi në këtë ministri, duke paralajmëruar se kjo situatë mund t’i detyrojë ata që të marrin masa për “ndërprerjen e të gjitha aktiviteteve e planifikuara” dhe që ushtria të funksionojë “vetëm me staf esencial”. Tha se po i ndjekin hapat e nevojshëm, ndërsa fajin për këtë situatë ua lidhjes së kontratave emergjente në të kaluarën.
Komandanti i FSK-së ka alarmuar për “rreziqet për pasoja shëndetësore” për ushtarët, për shkak të situatës aktuale me ushqimin, ndërkohë që në media janë publikuar fotografi të shujtave të ushtarëve dhe ankesat e tyre për atë që po u servohet.
Presidentja Vjosa Osmani të shtunën e ka ftuar në takim komandantin e FSK-së, Bashkim Jashari dhe ministrin e Mbrojtjes Ejup Maqedonci, për të diskutuar, ndërsa ka kërkuar raport të detajuar për situatën
Ministria e Mbrojtjes ka thënë paraprakisht se të gjitha kazermat e FSK-së janë funksionale dhe se në to po shërbehen llojllojshmëri shujtash, duke i quajtur propagandë raportimet në media.
